रत्नागिरी शहरातील मारुती मंदिर परिसरातील एका लॉजमध्ये ३४ वर्षीय तरुणाचा मृतदेह आढळून आल्याने मंगळवारी सायंकाळी खळबळ उडाली. आकाश दिलीप लोखंडे (वय ३४, रा. नवरेनगर, अंबरनाथ पूर्व, जि. ठाणे) असे मृत तरुणाचे नाव असून, या प्रकरणी पोलिसांनी आकस्मिक मृत्यूची नोंद केली आहे.
पोलिसांकडून मिळालेल्या माहितीनुसार, आकाश लोखंडे हे कामानिमित्त रत्नागिरी येथे आले होते. वास्तव्यासाठी त्यांनी शहरातील मारुती मंदिर परिसरातील संसारे कॉम्प्लेक्समधील आसरा लॉजमध्ये खोली घेतली होती. दरम्यान, २३ जून रोजी सायंकाळच्या सुमारास लॉजमधील रूम क्रमांक ११४ मध्ये ते बाथरूममध्ये गळफास घेतलेल्या अवस्थेत आढळून आले.
घटनेची माहिती मिळताच त्यांना तातडीने खासगी रुग्णवाहिकेद्वारे जिल्हा शासकीय रुग्णालयात दाखल करण्यात आले. मात्र, तेथील वैद्यकीय अधिकाऱ्यांनी तपासणी केल्यानंतर त्यांना मृत घोषित केले. या घटनेची माहिती परिसरात पसरताच काही काळ हळहळ व्यक्त करण्यात आली.
मृत्यूचे नेमके कारण अद्याप स्पष्ट झालेले नसून पोलिसांकडून सर्व बाजूंनी तपास सुरू आहे. शवविच्छेदन अहवाल प्राप्त झाल्यानंतर अधिक माहिती समोर येण्याची शक्यता व्यक्त करण्यात येत आहे.
या प्रकरणी भारतीय नागरिक सुरक्षा संहिता (बीएनएसएस) कलम १९४ अन्वये आमृ. क्रमांक ८०/२०२६ नुसार आकस्मिक मृत्यूची नोंद करण्यात आली असून, पुढील तपास पोलीस करत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
