दापोली एज्युकेशन सोसायटी संचलित ए.जी. हायस्कूल व ज्युनिअर कॉलेजच्या विद्यार्थ्यांनी राज्य सामाईक प्रवेश परीक्षा (सीईटी) २०२६ मध्ये उल्लेखनीय यश संपादन करत संस्थेच्या गुणवत्तापूर्ण शिक्षण परंपरेला साजेशी कामगिरी केली आहे. नुकत्याच जाहीर झालेल्या निकालात विज्ञान शाखेतील विद्यार्थ्यांनी उच्च पर्सेंटाईल मिळवत आपली गुणवत्ता सिद्ध केली असून संस्थेच्या शैक्षणिक उपक्रमांचे हे यशस्वी फलित मानले जात आहे.
पीसीएम (भौतिकशास्त्र, रसायनशास्त्र व गणित) गटात रोहित शिंदे याने पहिल्याच प्रयत्नात ९८.९५ पर्सेंटाईल मिळवत अव्वल स्थान पटकावले. त्याच्या या यशामुळे अभियांत्रिकी शिक्षणासाठीच्या स्पर्धेत त्याला मोठी संधी उपलब्ध झाली आहे. त्याचबरोबर तन्मय शेवडे आणि मुग्धा मोहिते यांनी प्रत्येकी ९६.८१ पर्सेंटाईल मिळवून उत्कृष्ट कामगिरी नोंदवली. वरून माने याने ९४.८४, गौरव गुरव याने ९२, श्रुती खोचरे हिने ९०.७० तसेच आर्यन घारपुरे याने ९०.११ पर्सेंटाईल मिळवत शाळेच्या यशात भर घातली.
पीसीबी (भौतिकशास्त्र, रसायनशास्त्र व जीवशास्त्र) गटात सानिका गुढेकर हिने ९८.९६ पर्सेंटाईल मिळवत उल्लेखनीय यश संपादन केले. वैद्यकीय क्षेत्रात करिअर घडविण्याचे स्वप्न पाहणाऱ्या विद्यार्थ्यांसाठी तिची ही कामगिरी प्रेरणादायी ठरली आहे. याच गटात श्रुती खोचरे हिने ९६.४५ तर सफा मुकादम हिने ९३.७३ पर्सेंटाईल मिळवत गुणवंत विद्यार्थ्यांच्या यादीत आपले स्थान निर्माण केले आहे. याशिवाय अनेक विद्यार्थ्यांनी समाधानकारक यश मिळवत संस्थेचा नावलौकिक वाढविला आहे.
विद्यार्थ्यांच्या या यशामागे दापोली एज्युकेशन सोसायटीने राबविलेला स्पर्धा परीक्षा मार्गदर्शन उपक्रम महत्त्वाचा ठरला आहे. विद्यार्थ्यांना सीईटी, जेईई, नीट आणि इतर स्पर्धा परीक्षांसाठी सक्षम करण्याच्या उद्देशाने संस्थेने विशेष नियोजनबद्ध अभ्यासक्रम, नियमित चाचण्या, मार्गदर्शन सत्रे आणि शंका निरसन वर्गांचे आयोजन केले होते. या उपक्रमांमुळे विद्यार्थ्यांचा आत्मविश्वास वाढला असून परीक्षेची तयारी अधिक प्रभावीपणे करता आली.
या यशामध्ये आयडियल कोचिंग क्लास, नाशिकचे तज्ज्ञ मार्गदर्शक विष्णू पिंगळे, निखिल कुलकर्णी आणि निलेश सावंत यांचे विशेष योगदान लाभले. त्यांनी विद्यार्थ्यांना विषयवार मार्गदर्शन, अभ्यास नियोजन आणि परीक्षेतील वेळेचे व्यवस्थापन याबाबत मोलाचे मार्गदर्शन केले.
तसेच ए.जी. हायस्कूल ज्युनिअर कॉलेजचे शिक्षक संदीप कान्हेकर, ओंकार पाठक, हेमंत कुलकर्णी, प्रशांत मोहिते, मानसी अभ्यंकर, राहुल विरकर, कल्पेश तलाठी, पुनम गायकवाड, अनुप्रिता सावर्डेकर आणि संध्या सकपाळ यांनी विद्यार्थ्यांना सातत्याने प्रोत्साहन व मार्गदर्शन दिले. शिक्षकांच्या अथक परिश्रमामुळे विद्यार्थ्यांना उत्कृष्ट यश संपादन करता आले, अशी भावना पालकांनीही व्यक्त केली.
विद्यार्थ्यांच्या या यशाबद्दल संस्थेच्या नियामक मंडळाचे अध्यक्ष प्रसाद करमरकर, सचिव विनोद जोशी, शालेय समिती अध्यक्ष रवींद्र कालेकर, सदस्य स्मिता सुर्वे तसेच सर्व संचालक मंडळाने अभिनंदन केले आहे. विद्यार्थ्यांनी भविष्यातही अशाच प्रकारे यशाची परंपरा कायम राखावी, अशी अपेक्षा व्यक्त करत त्यांच्या उज्ज्वल भवितव्यासाठी शुभेच्छा देण्यात आल्या.
दापोली तालुक्यातील विद्यार्थ्यांना दर्जेदार शिक्षणासह स्पर्धा परीक्षांची प्रभावी तयारी करून देण्यासाठी संस्था सातत्याने प्रयत्नशील असून अधिकाधिक विद्यार्थ्यांनी या सुविधांचा लाभ घ्यावा, असे आवाहनही संस्थेतर्फे करण्यात आले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
