प्रतिकूल परिस्थिती आणि सुविधांचा अभाव यांवर मात करत राजापूर तालुक्यातील झर्ये गावातील शेतकरी कुटुंबातील दीप्ती विश्वासराव हिने डॉक्टर होण्याचे स्वप्न साकार करून दाखवले आहे. तिच्या जिद्दीची आणि मेहनतीची ही प्रेरणादायी कहाणी आज अनेक विद्यार्थ्यांसाठी मार्गदर्शक ठरत आहे.
कोरोना काळात ऑनलाइन शिक्षण सुरू असताना झर्ये गावात मोबाईल नेटवर्कची सुविधा उपलब्ध नव्हती. त्यामुळे ऑनलाइन वर्ग आणि अभ्यासासाठी दीप्तीला गावाबाहेर झाडाखाली जाऊन बसावे लागत होते. अनेक अडचणी असूनही तिने अभ्यासात खंड पडू दिला नाही. वैद्यकीय प्रवेश परीक्षेची तयारी तिने चिकाटीने सुरू ठेवली आणि आपल्या ध्येयाकडे वाटचाल कायम ठेवली.
दीप्तीच्या संघर्षाची माहिती समाजमाध्यमांद्वारे देशभर पोहोचली. तिच्या जिद्दीची दखल घेत प्रसिद्ध क्रिकेटपटू सचिन तेंडुलकर यांनी तिच्या शिक्षणासाठी आर्थिक मदत आणि शिष्यवृत्ती उपलब्ध करून दिली. या मदतीमुळे तिच्या वैद्यकीय शिक्षणाचा मार्ग अधिक सुकर झाला.
आज दीप्ती वैद्यकीय अधिकारी म्हणून सेवा बजावत असून भविष्यात तज्ज्ञ डॉक्टर बनण्याचे तिचे स्वप्न आहे. अत्यंत साध्या परिस्थितीतून सुरू झालेला तिचा हा प्रवास मेहनत, जिद्द आणि आत्मविश्वासाच्या बळावर यशाचे शिखर गाठता येते, याचे उत्तम उदाहरण ठरत आहे.
परिस्थिती कितीही कठीण असली तरी ध्येय निश्चित असेल आणि प्रयत्न सातत्याने सुरू ठेवले तर यश निश्चित मिळते, हा संदेश दीप्ती विश्वासराव यांच्या यशोगाथेतून मिळतो.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
