खेड तालुक्यातील आंबडस गावातील ग्रामपंचायत कार्यालयात झालेल्या ग्रामसभेनंतर निर्माण झालेल्या वादाचे पर्यवसान हाणामारीत झाल्याची घटना घडली. या घटनेत एका व्यक्तीस गंभीर दुखापत झाली असून आठ जणांविरोधात खेड पोलीस ठाणे येथे गुन्हा दाखल करण्यात आला आहे.
पोलिसांनी दिलेल्या माहितीनुसार, शुक्रवार (दि. ५ जून २०२६) रोजी दुपारी सुमारे १.३० वाजण्याच्या सुमारास आंबडस ग्रामपंचायत कार्यालयात ग्रामसभा सुरू होती. ग्रामसभा सुरू असताना काही ग्रामस्थ आणि फिर्यादी सभागृहाबाहेर आले. त्यावेळी त्यांच्यात शाब्दिक वाद निर्माण झाला. सुरुवातीला किरकोळ स्वरूपाचा असलेला हा वाद काही वेळातच उग्र बनला आणि त्याचे रूपांतर हाणामारीत झाले.
या प्रकरणातील आरोपींनी फिर्यादी अमोल अशोक खेडेकर (वय ३२, रा. आंबडस गवळवाडी) तसेच संतोष विठ्ठल करंजकर यांना स्टीलच्या रॉडने तसेच हातापायांनी मारहाण केल्याचा आरोप आहे. या मारहाणीत अमोल खेडेकर यांना गंभीर दुखापत झाल्याची नोंद पोलिसांत करण्यात आली आहे.
दरम्यान, अमोल खेडेकर यांच्यावर होत असलेली मारहाण थांबविण्यासाठी त्यांचे भाऊ अनिल खेडेकर, वहिनी आदिती खेडेकर तसेच वडील अशोक खेडेकर घटनास्थळी धावून आले. मात्र, त्यांनाही आरोपींनी शिवीगाळ करत धक्काबुक्की व मारहाण केल्याचे फिर्यादीत नमूद करण्यात आले आहे.
या घटनेप्रकरणी तुकाराम करंजकर, रोहित करंजकर, संदेश खताते, संदीप करंजकर, विशेष करंजकर, चंद्रकांत करंजकर, संजय करंजकर आणि दिनेश करंजकर (सर्व रा. आंबडस, नक्वाडी) यांच्याविरोधात खेड पोलीस ठाण्यात गुन्हा दाखल करण्यात आला आहे.
ग्रामसभेनंतर घडलेल्या या घटनेमुळे परिसरात खळबळ उडाली असून गावात तणावाचे वातावरण निर्माण झाले आहे. पोलिसांनी प्रकरणाची नोंद करून पुढील तपास सुरू केला आहे. तपासाअंती घटनेमागील नेमके कारण आणि वादाची पार्श्वभूमी स्पष्ट होणार असल्याचे पोलिसांनी सांगितले.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
