खेड तालुक्यातील नारंगी फाटा परिसरात जनावरांच्या वाहतुकीच्या संशयावरून दोन गट आमनेसामने आल्याने मध्यरात्री मोठा राडा झाला. या वादात लोखंडी पाईप, बांबू आणि इतर वस्तूंनी झालेल्या मारहाणीत दोन्ही गटांतील एकूण सहा जण जखमी झाले असून, खेड पोलीस ठाण्यात परस्परविरोधी गुन्हे दाखल करण्यात आले आहेत. या घटनेमुळे परिसरात काही काळ तणावाचे वातावरण निर्माण झाले होते.
मिळालेल्या माहितीनुसार, ही घटना १३ मे रोजी रात्री साडेबाराच्या सुमारास नारंगी फाटा येथे घडली. पहिल्या तक्रारीत फिर्यादी ऋतिक सुनील जाधव यांनी नमूद केले आहे की, त्यांच्या भावाच्या वाहनात गुरे भरल्याच्या संशयावरून काही जणांनी वाहन अडवून जाब विचारला. त्यानंतर दोन्ही बाजूंमध्ये जोरदार वाद झाला. वादाचे रूपांतर हाणामारीत झाले असून आरोपींनी ऋतिक यांच्या भावाच्या कपाळावर कोणत्यातरी वस्तूने वार करून जखमी केले. तसेच ऋतिक यांच्या खांद्यावर बांबूने मारहाण करण्यात आली.
या प्रकरणी त्रुपेश निंबाळकर, रिक्षाचालक चव्हाण आणि खेडेकर यांच्याविरोधात गुन्हा दाखल करण्यात आला आहे. पोलिसांनी संबंधित आरोपींचा शोध सुरू केला असून घटनेबाबत अधिक माहिती गोळा केली जात आहे.
दरम्यान, याच घटनेप्रकरणी दुसऱ्या गटाकडूनही खेड पोलीस ठाण्यात तक्रार दाखल करण्यात आली. प्रसाद प्रकाश बर्गे यांनी दिलेल्या फिर्यादीनुसार, जनावरांची अवैध वाहतूक होत असल्याची माहिती मिळाल्यानंतर ते आपल्या सहकाऱ्यांसह नारंगी फाटा परिसरात गेले होते. तेथे सूरज जाधव याला अडवून विचारणा केल्याने वातावरण तणावपूर्ण झाले. याचा राग आल्याने सूरज आणि ऋतिक जाधव यांनी लाथाबुक्क्यांनी मारहाण केल्याचा आरोप करण्यात आला आहे.
तसेच, लोखंडी पाईपने हल्ला करून प्रसाद बर्गे यांना पुलावरून ढकलून दिल्याचा गंभीर आरोपही तक्रारीत करण्यात आला आहे. या घटनेत त्यांच्या पायाला गंभीर दुखापत झाली असून त्यांच्यावर उपचार सुरू आहेत. पोलिसांनी या तक्रारीवरून जाधव बंधूंविरोधात गुन्हा दाखल केला आहे.
या दुहेरी तक्रारींमुळे प्रकरण अधिक गुंतागुंतीचे बनले असून नेमकी मारहाण कोणी सुरू केली, याचा तपास पोलीस करत आहेत. घटनास्थळी काही काळ तणाव निर्माण झाल्याने परिसरात नागरिकांची मोठी गर्दी झाली होती. पोलिसांनी तातडीने हस्तक्षेप करत परिस्थिती नियंत्रणात आणली.
खेड पोलीस या प्रकरणाचा अधिक तपास करत असून, संबंधितांचे जबाब नोंदवण्याचे काम सुरू आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
