पारंपरिक मराठी युद्धकलेचा जागतिक स्तरावर गजर करणाऱ्या लाठी-काठी विश्वविक्रम उपक्रमात चिपळूणची कन्या गार्गी पराग पुरोहित हिने उल्लेखनीय सहभाग नोंदवत आपल्या कर्तृत्वाची ठळक छाप उमटवली आहे. तिच्या या यशामुळे संपूर्ण चिपळूण शहराची मान अभिमानाने उंचावली असून सर्वत्र तिच्यावर कौतुकाचा वर्षाव होत आहे.
नवी मुंबई येथे आयोजित करण्यात आलेल्या या भव्य विश्वविक्रम उपक्रमात देशभरातील शेकडो विद्यार्थ्यांनी उत्स्फूर्त सहभाग घेतला. लाठी-काठी कलेच्या माध्यमातून पारंपरिक युद्धकौशल्याचे प्रभावी सादरीकरण करण्यात आले. या विश्वविक्रम उपक्रमासाठी लाठी राष्ट्रीय पंच श्री. सुरेंद्र शिंदे व सौ. कविता शिंदे यांचे मार्गदर्शन लाभले.
गार्गीने शिस्त, एकाग्रता आणि कठोर परिश्रम यांच्या जोरावर सादर केलेल्या सामूहिक प्रात्यक्षिकाने उपस्थितांची मने जिंकली. तिच्या अचूक हालचाली, समन्वय आणि आत्मविश्वास यामुळे ती विशेष ठरली. या उल्लेखनीय कामगिरीची नोंद Golden Book of World Records मध्ये करण्यात आली असून, हा क्षण सर्व सहभागींसाठी अभिमानाचा ठरला आहे.
गार्गीच्या या यशामागे तिची जिद्द, चिकाटी आणि सातत्यपूर्ण सराव यांचा मोठा वाटा आहे. तिचे वडील श्री. पराग पुरोहित हे चिपळूणमधील ‘रॉयल मेडिकल’चे संचालक असून आई सौ. नीलम पुरोहित या प्राथमिक शिक्षिका आहेत. कुटुंबातील आजी-आजोबा तसेच नातेवाईकांच्या मार्गदर्शन आणि संस्कारांमुळेच गार्गीने ही उल्लेखनीय कामगिरी साध्य केल्याची भावना व्यक्त होत आहे.
लाठी-काठी ही केवळ क्रीडा कला नसून, ती छत्रपती शिवाजी महाराज यांच्या शौर्यपरंपरेशी जोडलेला समृद्ध सांस्कृतिक वारसा आहे. या कलेच्या माध्यमातून तरुण पिढीत शौर्य, आत्मविश्वास, शिस्त आणि संस्कृतीची जाणीव दृढ होत आहे.
गार्गीच्या या यशस्वी कामगिरीमुळे अनेक विद्यार्थ्यांना प्रेरणा मिळणार असून, तिचे उदाहरण भविष्यातील पिढीसाठी निश्चितच आदर्श ठरणार आहे. तिच्या या अभिमानास्पद यशाबद्दल सर्व स्तरांतून अभिनंदनाचा वर्षाव होत असून, चिपळूणकरांसाठी हा क्षण खऱ्या अर्थाने गौरवाचा आणि अभिमानाचा ठरला आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
