मंडणगड शहरात मोकाट कुत्र्यांचा त्रास दिवसेंदिवस वाढत असून आज (२९ एप्रिल) दुपारी सुमारे १२ वाजण्याच्या सुमारास घडलेल्या घटनेने परिसरात खळबळ उडाली आहे. राजभर कुटुंबातील चार वर्षांच्या मुलावर मोकाट कुत्र्याने हल्ला करून चावा घेतल्याने नागरिकांमध्ये भीती आणि संतापाचे वातावरण निर्माण झाले आहे.
ही घटना नगरपंचायत वॉर्ड क्रमांक २ मधील पाट रोड, बैकर चाळ परिसरात घडली. स्थानिक नागरिकांच्या माहितीनुसार, या भागात मोकाट कुत्र्यांचे गट सतत फिरताना दिसतात. आजही रस्त्यावर खेळत असलेल्या बालकावर अचानक कुत्र्यांनी हल्ला केल्याचे सांगितले जाते. काही क्षणांतच झालेल्या या प्रकारामुळे परिसरात एकच गोंधळ उडाला.
घटनेनंतर नागरिकांनी तत्काळ धाव घेऊन जखमी बालकाला सुरक्षितपणे बाजूला काढले आणि त्वरित मंडणगड येथील सरकारी रुग्णालयात उपचारासाठी दाखल केले. वैद्यकीय सूत्रांकडून मिळालेल्या माहितीनुसार, मुलावर प्राथमिक उपचार सुरू असून त्याची प्रकृती सध्या स्थिर आहे.
या घटनेमुळे परिसरातील नागरिकांमध्ये तीव्र नाराजी व्यक्त होत आहे. मोकाट कुत्र्यांचा वावर वाढल्याने लहान मुले, वृद्ध आणि महिला यांच्यासाठी रस्त्यावर फिरणे धोकादायक बनले असल्याचे स्थानिकांचे म्हणणे आहे. विशेषतः शाळा परिसर, वस्ती भाग आणि बाजारपेठ परिसरात कुत्र्यांचे टोळके दिसत असल्याचेही नागरिक सांगत आहेत.
दरम्यान, या घटनेनंतर मोकाट कुत्र्यांचा तातडीने बंदोबस्त करावा, अशी जोरदार मागणी होत आहे. नगरपंचायतीने कुत्र्यांची संख्या नियंत्रित करण्यासाठी तसेच नागरिकांच्या सुरक्षिततेसाठी ठोस उपाययोजना कराव्यात, अशी मागणी वॉर्ड क्रमांक २ मधील नागरिकांकडून करण्यात येत आहे.
या प्रकारामुळे स्थानिक प्रशासनावरही प्रश्नचिन्ह उपस्थित झाले असून भविष्यात अशा घटना टाळण्यासाठी तातडीने कारवाई होण्याची अपेक्षा व्यक्त केली जात आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
