कोकण किनारपट्टीवरील पर्यटकांचे आकर्षण ठरलेल्या आरे–वारे समुद्रकिनाऱ्यावर रविवारी (ता. 26) एक धक्कादायक घटना उघडकीस आली. आरे–वारे परिसरातील काजीरभाटी किनाऱ्यालगत समुद्रात एका महाकाय व्हेल माशाचा मृतदेह तरंगताना आढळल्याने स्थानिकांमध्ये मोठी खळबळ उडाली आहे.
रविवारी सायंकाळच्या सुमारास काही स्थानिक नागरिकांना समुद्राच्या पृष्ठभागावर एक प्रचंड आकाराचा मासा तरंगताना दिसला. सुरुवातीला नेमका प्रकार लक्षात आला नसला, तरी जवळून निरीक्षण केल्यानंतर तो व्हेल माशाचा मृतदेह असल्याचे स्पष्ट झाले. समुद्राच्या भरती-ओहोटीच्या लाटांमुळे हा मृतदेह हळूहळू किनाऱ्याकडे सरकत होता. ही बातमी परिसरात वाऱ्यासारखी पसरताच पंचक्रोशीतील नागरिकांनी किनाऱ्याकडे धाव घेतली आणि पाहण्यासाठी मोठी गर्दी झाली.
घटनेची माहिती मिळताच वन विभाग तसेच कांदळवन विभागाचे अधिकारी तातडीने घटनास्थळी दाखल झाले. त्यांनी परिस्थितीचा आढावा घेतला असता, व्हेल माशाचा मृतदेह अद्याप पाण्यातच असल्यामुळे त्याला बाहेर काढणे तांत्रिकदृष्ट्या अशक्य असल्याचे स्पष्ट झाले. त्यामुळे भरतीच्या लाटांबरोबर मृतदेह किनाऱ्यावर येण्याची प्रतीक्षा अधिकारी करत आहेत. किनाऱ्यावर आल्यानंतर पुढील कार्यवाही केली जाणार असल्याची माहिती अधिकाऱ्यांनी दिली.
दरम्यान, या व्हेल माशाचा मृत्यू नेमका कशामुळे झाला, याबाबत अद्याप कोणतीही अधिकृत माहिती समोर आलेली नाही. मात्र, प्राथमिक स्तरावर काही शक्यता वर्तवण्यात येत आहेत. समुद्रातील वाढते प्रदूषण, मोठ्या जहाजाची धडक लागणे, मासेमारीच्या जाळ्यात अडकणे, अथवा एखाद्या आजारामुळे नैसर्गिक मृत्यू होणे, अशा विविध कारणांचा तपास केला जाणार आहे. व्हेल किनाऱ्यावर आल्यानंतर त्याचे शवविच्छेदन करून मृत्यूचे नेमके कारण शोधले जाणार आहे.
कोकण किनारपट्टीवर यापूर्वीही अशा प्रकारच्या घटना घडल्या आहेत.
वेळोवेळी मोठ्या सागरी जीवांचे मृतदेह किनाऱ्यावर वाहून येण्याच्या घटनांमुळे सागरी पर्यावरणाच्या सुरक्षेबाबत गंभीर प्रश्न निर्माण झाले आहेत. विशेषतः वाढते प्रदूषण, मानवी हस्तक्षेप आणि समुद्री वाहतुकीमुळे सागरी जीवसृष्टी धोक्यात येत असल्याची चिंता तज्ज्ञांकडून व्यक्त केली जात आहे.
या पार्श्वभूमीवर, संबंधित यंत्रणांकडून या घटनेची सखोल चौकशी होणे गरजेचे असून, भविष्यात अशा घटना टाळण्यासाठी ठोस उपाययोजना करण्याची मागणी पर्यावरणप्रेमींकडून केली जात आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
