रत्नागिरी जिल्ह्यातील संगमेश्वर तालुक्यातील साखरपा-जाधववाडी परिसरात आज पहाटेच्या सुमारास एक भीषण घटना घडली. गद्रे पेट्रोल पंपासमोर धावत्या प्रवासी ट्रॅव्हल्सला अचानक आग लागून संपूर्ण गाडी जळून खाक झाली. सुदैवाने चालकाच्या प्रसंगावधानामुळे मोठी जीवितहानी टळली असून गाडीत प्रवास करणारे सर्व ३० प्रवासी सुखरूप बचावले आहेत.
मिळालेल्या माहितीनुसार, गोविंद धोंडीराम साळुंखे (वय ३५, रा. लातूर) यांच्या ताब्यातील एनएल ०१ बी २४४२ क्रमांकाची प्रवासी ट्रॅव्हल्स पुणे येथून सायंकाळी सहाच्या सुमारास रत्नागिरीकडे रवाना झाली होती. या गाडीत एकूण ३० प्रवासी प्रवास करत होते.
गाडी पहाटे सुमारे ३.३० वाजता साखरपा-जाधववाडी येथील गद्रे पेट्रोल पंपासमोर पोहोचली असता चालकाच्या निदर्शनास वाहनाच्या मागील भागातून धूर निघत असल्याचे आले. काही क्षणांतच धुराचे रूपांतर ज्वाळांमध्ये झाले आणि आगीने भीषण रूप धारण केले.
परिस्थितीचे गांभीर्य ओळखून चालकाने कोणतीही घाबराट न करता तत्काळ गाडी रस्त्याच्या कडेला उभी केली आणि सर्व प्रवाशांना तातडीने खाली उतरवले. अंधार आणि घाईच्या परिस्थितीतही प्रवाशांनी शिस्तबद्धपणे गाडीतून बाहेर पडत आपला जीव वाचवला. चालकाच्या या धाडसी व तत्पर निर्णयामुळे मोठा अनर्थ टळला.
दरम्यान, आगीने काही क्षणांतच संपूर्ण ट्रॅव्हल्सला कवेत घेतले. स्थानिक नागरिकांनी आणि प्रवाशांनी आग विझवण्याचा प्रयत्न केला; मात्र आगीची तीव्रता अधिक असल्याने ते शक्य झाले नाही. त्यानंतर अग्निशमन दलाला पाचारण करण्यात आले. घटनास्थळी दाखल झालेल्या अग्निशमन दलाने शर्थीचे प्रयत्न करून आगीवर नियंत्रण मिळवले, परंतु तोपर्यंत संपूर्ण वाहन जळून खाक झाले होते.
प्राथमिक माहितीनुसार, वाहनाच्या विद्युत यंत्रणेमध्ये बिघाड होऊन शॉर्ट सर्किटमुळे आग लागल्याची शक्यता व्यक्त केली जात आहे. मात्र, नेमके कारण शोधण्यासाठी अधिक तपास सुरू आहे.
घटनेची माहिती मिळताच साखरपा दूरक्षेत्र पोलीस ठाण्याचे अधिकारी तातडीने घटनास्थळी दाखल झाले. त्यांनी वाहतूक सुरळीत ठेवण्यासाठी पर्यायी मार्गाची व्यवस्था केली तसेच प्रवाशांना आवश्यक ती मदत पुरवली. काही प्रवाशांना किरकोळ धक्का बसला असला तरी कोणतीही गंभीर दुखापत झालेली नाही.
या घटनेमुळे साखरपा परिसरात काही काळ भीतीचे वातावरण निर्माण झाले होते. मात्र सर्व प्रवासी सुरक्षित असल्यामुळे नागरिकांनी समाधान व्यक्त केले. चालकाच्या प्रसंगावधानाचे सर्वत्र कौतुक होत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
