रत्नागिरी जिल्ह्यातील लांजा तालुक्यात सोमवारी दुपारी घडलेल्या भीषण अपघातात एका तरुणाचा दुर्दैवी मृत्यू झाला. वाटुळ-दाभोळे मार्गावर विलवडे रेल्वे स्थानकाजवळ भरधाव दुचाकी आणि टँकर यांच्यात झालेल्या समोरासमोर धडकेत हा अपघात घडला.
ही घटना ३० मार्च रोजी दुपारी सुमारे १२ वाजण्याच्या सुमारास घडली. मिळालेल्या माहितीनुसार, टँकर चालक चांद बागवान (रा. सोलापूर) हे (एमएच ४६ सीएल ७५३६) क्रमांकाचा टँकर घेऊन आंबा घाटमार्गे कोल्हापूरच्या दिशेने जात होते. टँकर विलवडे रेल्वे स्थानकापासून सुमारे २०० मीटर अंतरावर आला असताना समोरून येणाऱ्या दुचाकीने अचानक नियंत्रण गमावले आणि थेट टँकरला जोरदार धडक दिली.
या अपघातात दुचाकीस्वार तेजस नरेंद्र देशपांडे (वय २३, रा. हुपरी, सांगली) यांचा जागीच मृत्यू झाला. धडक इतकी भीषण होती की, दुचाकीचे मोठ्या प्रमाणात नुकसान झाले असून तरुणाला गंभीर दुखापत झाली. घटनास्थळीच त्यांचा मृत्यू झाल्याने उपस्थित नागरिकांमध्ये हळहळ व्यक्त करण्यात आली.
प्राथमिक तपासात असे समोर आले आहे की, दुचाकीचा वेग जास्त होता तसेच रस्त्याच्या परिस्थितीकडे दुर्लक्ष झाल्याने हा अपघात घडला असावा. अरुंद व वळणदार रस्ता, तसेच वेगावर नियंत्रण नसणे ही कारणेही या दुर्घटनेमागे असल्याची शक्यता व्यक्त केली जात आहे.
अपघाताची माहिती मिळताच स्थानिक नागरिकांनी घटनास्थळी धाव घेतली आणि पोलिसांना कळविले. त्यानंतर लांजा पोलीस ठाणे येथील पथकाने घटनास्थळी पोहोचून पंचनामा केला व मृतदेह ताब्यात घेतला.
या प्रकरणी टँकर चालक चांद बागवान यांनी लांजा पोलीस ठाण्यात फिर्याद दाखल केली असून, त्यानुसार पोलिसांनी मयत दुचाकीस्वार तेजस देशपांडे यांच्या विरोधात गुन्हा नोंदवला आहे.
पोलीस निरीक्षक निळकंठ बगळे यांच्या मार्गदर्शनाखाली पोलीस हेड कॉन्स्टेबल दिनेश आखाडे या प्रकरणाचा पुढील तपास करत आहेत. या घटनेमुळे पुन्हा एकदा बेदरकार वाहनचालकांबाबत प्रश्नचिन्ह निर्माण झाले असून, वाहन चालवताना वेगावर नियंत्रण ठेवणे आणि वाहतूक नियमांचे पालन करणे अत्यावश्यक असल्याचे अधोरेखित झाले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
