रत्नागिरी शहरातील राजिवडा पुलाखाली मंगळवारी (दि. २१ ऑक्टोबर २०२५) सायंकाळी साडेचारच्या सुमारास प्रेमसंबंधाच्या वादातून आरोपींनी बाप-लेकाच्या डोक्यात लादीचा तुकडा घालून त्यांना गंभीर जखमी केल्याची धक्कादायक घटना समोर आली आहे. या घटनेमुळे परिसरात एकच खळबळ उडाली असून रत्नागिरी शहर पोलीस ठाण्यात संबंधित आरोपींविरोधात गंभीर गुन्हा दाखल करण्यात आला आहे.
पोलिसांकडून मिळालेल्या माहितीनुसार, नजीर हसनमियाँ होडेकर (वय ५२, रा. राजिवडा पुलाखाली) हे मासेमारी करून घरी परतले असताना त्यांचा मुलगा अरमान होडेकर याच्यावर आरोपी रमजान नवाज मिरकर (वय २६) मारहाण करत होता. हे पाहून वडील नजीर यांनी भांडण सोडवण्याचा प्रयत्न केला. मात्र, या प्रयत्नामुळे परिस्थिती आणखी चिघळली.
यावेळी आरोपी रमजान मिरकर याने नजीर यांना उद्देशून, “तू इथे थांबू नकोस. तुमच्या पत्नीने माझ्या आणि तुमच्या सुनेच्या प्रेमसंबंधांबद्दल बदनामी केली आहे. आता तुलाही ठार मारीन,” अशी उघड धमकी दिली.
त्यानंतर त्याने त्वेषाने हातातील दगडी लादीचा तुकडा नजीर यांच्या डोक्यात घालून त्यांना रक्तबंबाळ केले. याचवेळी रमजानचा वडील, नवाज अलीसाहब मिरकर (वय ४५), याने देखील नजीर यांना हाताने मारहाण केली.
भांडण सोडवण्याचा प्रयत्न करणारा मुलगा अरमान देखील यातून सुटला नाही. रमजान मिरकर याने त्याच दगडी लादीने अरमानच्या डोक्यातही प्रहार करून त्याला गंभीर जखमी केले. यावेळी दोघा आरोपींनी बाप-लेकाला शिवीगाळ देखील केली. घटनेनंतर जखमी नजीर आणि अरमान यांना उपचारासाठी रुग्णालयात दाखल करण्यात आले असून, नजीर होडेकर यांच्या तक्रारीवरून रत्नागिरी शहर पोलीस ठाण्यात गुन्हा दाखल करण्यात आला आहे.
या प्रकरणी रमजान नवाज मिरकर आणि नवाज अलीसाहब मिरकर यांच्याविरोधात भारतीय दंड संहिता कायदा २०२३ चे कलम ११८(१), ११५(२), ३५२, ३५१(२), ३(५) अंतर्गत गुन्हा क्रमांक ४०८/२०२५ नोंदवण्यात आला आहे. पुढील तपास रत्नागिरी शहर पोलीस करत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
