रत्नागिरी तालुक्यातील मौजे शिळ-कदमवाडी येथील नदीकाठच्या झाडीझुडपात बेकायदा सुरू असलेल्या गावठी हातभट्टी दारू अड्ड्यावर रत्नागिरी शहर पोलिसांनी मंगळवारी सकाळी छापा टाकला. या कारवाईत पोलिसांनी सुमारे १ लाख ९२ हजार २०० रुपये किमतीचा मुद्देमाल जप्त केला असून, एका संशयिताविरोधात गुन्हा दाखल करण्यात आला आहे.
शिळ-कदमवाडी परिसरातील नदीकाठच्या निर्जन आणि जंगलमय भागात गावठी हातभट्टी दारू तयार केली जात असल्याची माहिती पोलिसांना मिळाली होती. त्यानुसार मंगळवारी सकाळी सुमारे ९ वाजण्याच्या सुमारास रत्नागिरी शहर पोलिसांनी संबंधित ठिकाणी छापा टाकला.
या कारवाईदरम्यान करबुडे येथील सुनील सुरेश आग्रे (३८, रा. आग्रेवाडी, करबुडे, ता. जि. रत्नागिरी) हा विनापरवाना स्वतःच्या आर्थिक फायद्यासाठी हातभट्टी दारू तयार करताना आढळून आल्याचे पोलिसांनी सांगितले.
पोलिसांनी घटनास्थळाची झडती घेतली असता, विविध २०० लिटर क्षमतेच्या बॅरल्समध्ये साठवलेले सुमारे २ हजार ९०० लिटरहून अधिक गूळ-नवसागरमिश्रित कुजके रसायन, ४० लिटर तयार हातभट्टी दारू तसेच दारू गाळण्यासाठी वापरण्यात येणारी ॲल्युमिनियमची डेग, लाकडी चाटू, पाईप, प्लॅस्टिक कॅन्स आदी साहित्य आढळून आले.
हा सर्व मुद्देमाल पोलिसांनी जप्त केला असून, त्याची एकूण किंमत १ लाख ९२ हजार २०० रुपये असल्याचे नमूद करण्यात आले आहे.
याप्रकरणी महिला पोलीस हेडकॉन्स्टेबल अमिता संदीप पाटील यांनी दिलेल्या फिर्यादीवरून सुनील आग्रे याच्याविरोधात महाराष्ट्र दारूबंदी कायद्यातील विविध कलमांन्वये गुन्हा दाखल करण्यात आला आहे. या प्रकरणाचा पुढील तपास रत्नागिरी शहर पोलीस करत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
