दिवाळीच्या पार्श्वभूमीवर चिपळूण शहरातील बाजारपेठेची सुरक्षितता लक्षात घेता नगरपरिषदेने महत्त्वपूर्ण निर्णय घेतला आहे. बाजारपेठ परिसरात फटाक्यांची विक्री करण्यास बंदी घालण्यात आली असून, फटाके विक्रेत्यांसाठी स्वतंत्र जागा निश्चित करण्यात येणार आहे. नगराध्यक्ष उमेश सकपाळ यांच्या अध्यक्षतेखाली झालेल्या नगरपरिषदेच्या सर्वसाधारण सभेत हा निर्णय घेण्यात आला.
दिवाळीच्या काळात चिपळूणच्या बाजारपेठेत खरेदीसाठी नागरिकांची मोठी गर्दी होत असते. अशा परिस्थितीत बाजारपेठेत फटाक्यांचे स्टॉल उभारल्यास आग लागण्यासह अन्य दुर्घटनांचा धोका निर्माण होऊ शकतो. यापूर्वी बाजारपेठ परिसरात आगीच्या घटना घडल्याने भविष्यात अशी परिस्थिती निर्माण होऊ नये, यासाठी नगरपरिषदेने खबरदारीचा उपाय म्हणून हा निर्णय घेतला आहे.
फटाके विक्रेत्यांना व्यवसायासाठी शहरातील स्वतंत्र आणि सुरक्षित जागा उपलब्ध करून देण्यात येणार आहे. यासाठी नगराध्यक्ष उमेश सकपाळ यांच्या मार्गदर्शनाखाली नगरसेवकांकडून संभाव्य जागेची पाहणी केली जाणार आहे. जागा निश्चित झाल्यानंतर सर्व फटाके विक्रेत्यांना तेथे स्टॉल उभारण्यासाठी जागा उपलब्ध करून दिली जाणार आहे.
या निर्णयामुळे फटाके विक्रेत्यांना एकाच ठिकाणी व्यवसाय करता येईल, तर नागरिकांनाही सुरक्षित वातावरणात फटाक्यांची खरेदी करता येणार आहे. त्याचबरोबर बाजारपेठेतील गर्दी आणि संभाव्य आगीचा धोका कमी करण्यास मदत होणार आहे.
चिपळूणच्या बाजारपेठेत कोणत्याही ठिकाणी फटाक्यांची विक्री होऊ नये, यासाठी नगरपरिषद प्रशासनाकडून विशेष दक्षता घेतली जाणार आहे, अशी माहिती बांधकाम समितीचे सभापती कपिल शिर्के यांनी दिली.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
