रत्नागिरी तालुक्यातील आरे-वारे समुद्रकिनाऱ्यावर पर्यटकांना मारहाण झाल्याच्या घटनेने काही काळ भीतीचे वातावरण निर्माण झाले होते. मात्र रत्नागिरी ग्रामीण पोलिसांनी केलेल्या वेगवान आणि अचूक कारवाईमुळे अवघ्या ४८ तासांत आरोपींना जेरबंद करण्यात यश आले आहे.
२ मे रोजी मुंबईतील दहिसर परिसरातून आलेले काही पर्यटक आरे समुद्रकिनाऱ्यावर फिरण्यासाठी आले होते. सायंकाळी परत जात असताना त्यांचा काही स्थानिक तरुणांशी किरकोळ कारणावरून वाद झाला. हा वाद काही क्षणांतच विकोपाला गेला आणि संबंधित तरुणांनी पर्यटकांना मारहाण करत दमदाटी केल्याची घटना घडली. या प्रकारामुळे परिसरात तणाव निर्माण झाला होता.
घटनेनंतर पर्यटकांनी तत्काळ पोलिसांकडे धाव घेत तक्रार दाखल केली. पर्यटनस्थळी घडलेल्या या गंभीर घटनेची दखल घेत रत्नागिरी ग्रामीण पोलिसांनी तपासाला वेग दिला. वरिष्ठ अधिकाऱ्यांच्या मार्गदर्शनाखाली विशेष पथक तयार करण्यात आले.
तांत्रिक तपास, हालचालींचे विश्लेषण तसेच स्थानिक माहितीदारांच्या मदतीने आरोपींचा शोध घेण्यात आला. तपासादरम्यान आरोपी पनवेल परिसरात लपल्याची माहिती मिळाल्यानंतर पोलिसांनी सापळा रचत चारही आरोपींना ताब्यात घेतले.
गुन्हा घडल्यानंतर अवघ्या दोन दिवसांत आरोपींना अटक करण्यात आल्याने पोलिसांच्या कार्यक्षमतेचे कौतुक होत आहे. पर्यटनस्थळी अशा घटना जिल्ह्याच्या प्रतिमेला धक्का पोहोचवू शकतात, याची जाणीव ठेवून पोलिसांनी दाखवलेली तत्परता विशेष महत्त्वाची ठरली आहे.
या कारवाईमुळे “पर्यटकांची सुरक्षितता सर्वोच्च” असल्याचा स्पष्ट संदेश गेला असून, आरोपींविरोधात पुढील कायदेशीर प्रक्रिया सुरू आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
