पत्रकार शशिकांत वारीशे यांच्या हत्या प्रकरणातील मुख्य संशयित आरोपी पंढरीनाथ व्ही. आंबेरकर याला जामीन मिळवण्यात पुन्हा एकदा अपयश आले आहे. रत्नागिरी सत्र न्यायालयाने त्याचे जामिनासाठी दाखल केलेले दोन्ही अर्ज फेटाळून लावले आहेत. अतिरिक्त सत्र न्यायाधीश ए. एम. आंबळकर यांनी २७ ऑक्टोबर २०२६ रोजी हा महत्त्वपूर्ण निर्णय दिला. त्यामुळे आंबेरकरचा तुरुंगातील मुक्काम तूर्तास कायम राहणार आहे.
जामिनासाठी आंबेरकर याने न्यायालयात तब्बल ४९ परिच्छेदांचा सविस्तर अर्ज दाखल केला होता. त्यामध्ये वैद्यकीय कारणांसह खटल्यातील काही साक्षीदार प्रतिकूल झाल्याचा मुद्दा उपस्थित करण्यात आला होता. मात्र, सरकारी पक्षाने मांडलेले युक्तिवाद आणि उपलब्ध पुराव्यांचा विचार करून न्यायालयाने दोन्ही अर्ज फेटाळले.
नेमके काय आहे वारीशे हत्या प्रकरण?
अभियोग पक्षाच्या दाव्यानुसार, कोडवली येथील हॉटेल सरस्वतीजवळ पंढरीनाथ आंबेरकर याने आपली महिंद्रा थार गाडी रस्त्याच्या विरुद्ध दिशेने चालवत पत्रकार शशिकांत वारीशे यांच्या ॲक्टिव्हा दुचाकीला जोरदार धडक दिली होती. या अपघातात गंभीर जखमी झालेल्या वारीशे यांचा उपचारादरम्यान कोल्हापूर येथे मृत्यू झाला होता.
शशिकांत वारीशे यांनी एका वर्तमानपत्रात आंबेरकर यांच्याविरोधात गंभीर आरोप करणारा तसेच रिफायनरी प्रकल्पाशी संबंधित लेख प्रसिद्ध केला होता. याच लेखाच्या पार्श्वभूमीवर आंबेरकर यांनी अपघाताचा बनाव करून वारीशे यांची हत्या केल्याचा आरोप तपास यंत्रणेने केला आहे. त्यामुळे हे प्रकरण केवळ अपघाताचे नसून नियोजित हत्येचे असल्याचा अभियोग पक्षाचा दावा आहे.
आजारपणाचे कारण देत जामिनाची मागणी
जामीन अर्जात आंबेरकर यांनी आपल्या विविध आजारांचा उल्लेख केला होता. मधुमेह, उच्च रक्तदाब, अँजिओप्लास्टी, पित्ताशयाचे विकार, मूळव्याध आणि मूत्रपिंडाच्या आजारांचा दाखला देण्यात आला होता. जिल्हा रुग्णालयात आवश्यक तज्ज्ञ डॉक्टर उपलब्ध नसल्याने खासगी रुग्णालयात उपचार मिळावेत, तसेच मानसिक तणावामुळे मानसोपचाराची गरज असल्याचेही बचाव पक्षाकडून सांगण्यात आले.
याशिवाय खटल्यातील एकूण २८ साक्षीदारांपैकी मुख्य प्रत्यक्षदर्शी साक्षीदारासह काही साक्षीदार प्रतिकूल झाल्याचा मुद्दाही जामीन अर्जात मांडण्यात आला. त्यामुळे आपल्याविरुद्धचा पुरावा कमकुवत झाल्याचा युक्तिवाद बचाव पक्षाने केला होता.
सरकारी पक्षाचा साक्षीदारांच्या सुरक्षेचा मुद्दा
मात्र, सरकारी पक्षाने जामिनाला जोरदार विरोध केला. खटला अद्याप महत्त्वाच्या टप्प्यावर असून अनेक प्रमुख साक्षीदारांची साक्ष नोंदवणे बाकी आहे. अशा परिस्थितीत आरोपीला जामीन मिळाल्यास साक्षीदारांवर दबाव आणला जाण्याची किंवा त्यांना धमकावले जाण्याची शक्यता सरकारी पक्षाने व्यक्त केली.
विशेष म्हणजे, आंबेरकर यांच्या कथित दहशतीमुळे आपल्या जीवाला धोका असल्याचे सांगत स्थानिक नागरिकांकडून पोलिसांना तब्बल ४७ अर्ज प्राप्त झाल्याची माहिती तपास अधिकाऱ्यांनी न्यायालयासमोर मांडली. रिफायनरी परिसरातील जमिनींचे संशयास्पद व्यवहार आणि आरोपीची राजकीय क्षेत्रातील पकड यांचाही संदर्भ सरकारी पक्षाने दिला. आरोपीला जामीन मिळाल्यास साक्षीदारांच्या मनात भीती निर्माण होऊ शकते, असा युक्तिवाद करण्यात आला.
साक्षीदार प्रतिकूल झाले म्हणजे खटला संपत नाही; न्यायालयाचे महत्त्वपूर्ण निरीक्षण
दोन्ही बाजूंचे युक्तिवाद ऐकल्यानंतर न्यायालयाने जामीन अर्ज फेटाळताना महत्त्वपूर्ण निरीक्षण नोंदवले. काही साक्षीदार प्रतिकूल झाले म्हणून संपूर्ण खटला संपला असे होत नाही. इतर भक्कम पुरावे उपलब्ध असू शकतात. तसेच जामीन अर्जाच्या टप्प्यावर पुराव्यांच्या गुणवत्तेचे अंतिम मूल्यमापन करता येत नाही, असे न्यायालयाने स्पष्ट केले.
आजारपणाच्या मुद्द्यावरही न्यायालयाने भूमिका स्पष्ट केली. यापूर्वी आरोपीला उपचाराची संधी देण्यात आली असून, यापुढेही आवश्यकतेनुसार पोलीस बंदोबस्तात रत्नागिरीतील खासगी रुग्णालयात उपचार घेण्याची सुविधा उपलब्ध करून देता येऊ शकते, असे न्यायालयाने नमूद केले.
दोन्ही जामीन अर्ज फेटाळले; तुरुंगातील मुक्काम कायम
अशा प्रकारे आरोपीच्या वैद्यकीय कारणांचा तसेच साक्षीदार प्रतिकूल झाल्याच्या युक्तिवादाचा विचार करूनही न्यायालयाने त्याला जामीन देण्यास नकार दिला. निशाणी क्रमांक ३१९ आणि ३२८ वरील दोन्ही जामीन अर्ज अतिरिक्त सत्र न्यायाधीश ए. एम. आंबळकर यांनी फेटाळले.
पत्रकार शशिकांत वारीशे हत्या प्रकरणातील हा निर्णय महत्त्वपूर्ण मानला जात आहे. या निर्णयामुळे आंबेरकरला जामीन मिळवण्याच्या प्रयत्नांना पुन्हा अपयश आले असून, खटल्यातील पुढील सुनावणीकडे आता लक्ष लागले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
