खेड तालुक्यातील अल्पवयीन मुलीवरील लैंगिक अत्याचार प्रकरणात जिल्हा व अतिरिक्त सत्र न्यायालयाने आरोपीला कठोर शिक्षा सुनावत महत्त्वपूर्ण निकाल दिला आहे. आरोपी रोहन शंकर पालकर (वय २३, रा. खारी-सेसरी, ता. खेड) याला न्यायालयाने दोषी ठरवत २० वर्षे सक्तमजुरीची शिक्षा सुनावली. जिल्हा न्यायाधीश पी. एन. चांगुडे यांनी हा निकाल दिला. याशिवाय आरोपीला विविध कलमान्वये दंडाची शिक्षाही ठोठावण्यात आली असून, दंडाची रक्कम न भरल्यास अतिरिक्त कारावास भोगावा लागणार आहे.
ही घटना कोविड काळातील असून, त्या वेळी पीडित मुलगी शालेय शिक्षण घेत होती. ऑनलाइन वर्गासाठी ती आपल्या मैत्रिणीच्या घरी गेली असताना आरोपीने घरात कोणी नसल्याचा फायदा घेत तिच्यावर जबरदस्तीने लैंगिक अत्याचार केला. या घटनेनंतर आरोपीने पीडित मुलीला जीवे मारण्याची धमकी देत हा प्रकार कुणालाही सांगू नये, अशी दमदाटी केली होती. त्यामुळे घाबरलेल्या अवस्थेत पीडित मुलगी काही काळ शांत राहिली.
मात्र, कालांतराने तिच्या वर्तनात बदल दिसू लागल्याने कुटुंबीयांना संशय आला. त्यांनी मुलीला विश्वासात घेत चौकशी केली असता संपूर्ण प्रकार समोर आला. त्यानंतर कुटुंबीयांनी खेड पोलीस ठाण्यात धाव घेत तक्रार दाखल केली. पोलिसांनी तत्काळ गुन्हा नोंदवत तपास सुरू केला.
या प्रकरणाचा तपास महिला पोलीस उपनिरीक्षक सोनाली झेंडे यांच्या मार्गदर्शनाखाली करण्यात आला. तपासादरम्यान पीडितेचा जबाब, वैद्यकीय तपासणी, घटनास्थळ पंचनामा तसेच डीएनए अहवाल यासारखे महत्त्वाचे पुरावे गोळा करण्यात आले. या पुराव्यांच्या आधारे आरोपीविरुद्ध भक्कम दोषारोपपत्र न्यायालयात सादर करण्यात आले.
खटल्याच्या सुनावणीदरम्यान सरकार पक्षाकडून एकूण ११ साक्षीदार तपासण्यात आले. पीडित मुलीची साक्ष, वैद्यकीय अहवाल आणि डीएनए अहवाल हे या प्रकरणातील अत्यंत महत्त्वाचे पुरावे ठरले. सरकार पक्षातर्फे सरकारी वकील मृणाल जाडकर यांनी प्रभावी युक्तिवाद करत आरोपीविरुद्धचे पुरावे न्यायालयासमोर सादर केले.
सर्व पुरावे, साक्षी आणि युक्तिवादांचा सखोल विचार करून न्यायालयाने आरोपीविरुद्धचा गुन्हा निर्विवादपणे सिद्ध झाल्याचे नमूद केले. न्यायालयाने भारतीय दंड संहितेतील विविध कलमांसह पोक्सो कायदा अंतर्गत आरोपीला दोषी ठरवत २० वर्षे सक्तमजुरीची शिक्षा सुनावली. या निकालामुळे पीडित कुटुंबाला न्याय मिळाल्याची भावना व्यक्त होत असून, अल्पवयीन मुलींवरील अत्याचाराच्या घटनांमध्ये कठोर शिक्षा होणार असल्याचा स्पष्ट संदेश समाजात गेला आहे. तसेच या प्रकरणात तपास करणाऱ्या पोलीस अधिकारी, कर्मचारी आणि सरकारी पक्षाच्या वकिलांच्या कामगिरीचेही सर्वत्र कौतुक होत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
