दापोली तालुक्यातील करंजाणी-कातळवाडी येथे कौटुंबिक वादातून मुलाने आपल्या वडिलांना व सावत्र आईला मारहाण केल्याची घटना घडली आहे. या प्रकरणी दापोली पोलीस ठाण्यात गुन्हा दाखल करण्यात आला असून जखमी वृद्ध शेतकऱ्यावर उपचार करण्यात आले आहेत.
पोलिसांकडून मिळालेल्या माहितीनुसार, ही घटना १३ जून २०२६ रोजी सायंकाळी ७.३० ते ८ वाजण्याच्या दरम्यान करंजाणी-कातळवाडी येथे घडली. याप्रकरणी सुरेश श्रीपद आये (वय ६७, व्यवसाय शेती, रा. करंजाणी-कातळवाडी, ता. दापोली) यांनी फिर्याद दिली आहे.
फिर्यादीनुसार, सुरेश आये व त्यांची पत्नी सुरेखा हे घरात असताना त्यांचा मुलगा सुरेंद्र सुरेश आये (वय ३७) हा मद्यप्राशन करून घरी आला. फिर्यादींनी दुसरा विवाह केल्याच्या रागातून त्याने सुरेखा यांना शिवीगाळ करत धक्काबुक्की केली. त्यानंतर वाद वाढल्याने मध्यस्थी करण्यासाठी गेलेल्या वडिलांनाही आरोपीने शिवीगाळ व धक्काबुक्की केली.
इतक्यावर न थांबता आरोपीने हाताने मारहाण केली तसेच घरातील फायबरची खुर्ची डोक्यात मारल्याने सुरेश आये जखमी झाले. घटनेनंतर जखमींनी पोलिसांत धाव घेत तक्रार दाखल केली.
या प्रकरणी दापोली पोलीस ठाण्यात गुन्हा क्रमांक १२०/२०२६ नोंद करण्यात आला असून भारतीय न्यायसंहिता (बीएनएस) २०२३ अंतर्गत कलम ११८(१), ३५२, ११५(२) तसेच शिवीगाळ व धमकीसंदर्भातील संबंधित कलमांनुसार गुन्हा दाखल करण्यात आला आहे. हा गुन्हा १४ जून २०२६ रोजी पहाटे २.२९ वाजता नोंदविण्यात आला.
पोलिसांकडून घटनेचा पुढील तपास सुरू असून कौटुंबिक वादातून घडलेल्या या प्रकारामुळे परिसरात चर्चा रंगली आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
