मध्यप्रदेशातील झाबुवा जिल्ह्यात घडलेल्या खळबळजनक खून प्रकरणातील तीन फरार आरोपींना अटक करण्यात रत्नागिरी पोलिसांना उल्लेखनीय यश मिळाले आहे. अत्यंत गुप्त आणि नियोजनबद्ध कारवाईत हे आरोपी रत्नागिरी शहरात लपून बसले असताना जेरबंद करण्यात आले.
मिळालेल्या माहितीनुसार, झाबुवा येथील कोतवाली पोलीस ठाण्यात गुन्हा रजिस्टर क्रमांक ३४०/२०२६ अंतर्गत भारतीय न्याय संहितेच्या विविध गंभीर कलमान्वये गुन्हा दाखल आहे. या प्रकरणातील संशयित आरोपी घटनेनंतर फरार झाले होते. त्यांचा शोध घेण्यासाठी झाबुवा पोलिसांनी विशेष पथकाची नियुक्ती केली होती. तपासादरम्यान आरोपी महाराष्ट्रातील रत्नागिरी येथे लपून बसल्याची खात्रीशीर माहिती समोर आली.
या माहितीच्या आधारे झाबुवा पोलिसांचे पथक रत्नागिरीत दाखल झाले. स्थानिक गुन्हे अन्वेषण विभागाच्या सहकार्याने आरोपींच्या हालचालींवर गोपनीय पाळत ठेवण्यात आली. पोलीस निरीक्षक विवेक पाटील यांच्या मार्गदर्शनाखाली डी.बी. पथकाने कौशल्यपूर्ण सापळा रचत योग्य वेळी कारवाई केली आणि तिन्ही आरोपींना अटक केली.
अटक करण्यात आलेल्या आरोपींची नावे दाउद चिलिया वाकला, नब्बु चिलिया वाकला आणि चिलिया कलिसींग वाकला (सर्व रा. झाबुवा, मध्यप्रदेश) अशी आहेत. या आरोपींवर भारतीय न्याय संहितेच्या कलम १९१(१), १९१(२), १९१(३), १९०, १०३(१), २९६(१) आणि ३५१(२) अन्वये गंभीर गुन्हे नोंद आहेत.
अटकेनंतर संबंधित आरोपींवर कायदेशीर प्रक्रिया पूर्ण करण्यात आली असून पुढील तपासासाठी त्यांना झाबुवा पोलिसांच्या ताब्यात देण्यात आले आहे. या कारवाईमुळे खून प्रकरणाच्या तपासाला गती मिळणार असून इतर संबंधित बाबी उघडकीस येण्याची शक्यता वर्तवली जात आहे.
ही संपूर्ण कारवाई पोलीस अधीक्षक नितीन दत्तात्रय बगाटे, अप्पर पोलीस अधीक्षक महामुनी तसेच उपविभागीय पोलीस अधिकारी माईणकर यांच्या मार्गदर्शनाखाली पार पडली. या मोहिमेत पोलीस निरीक्षक विवेक पाटील, पोलीस उपनिरीक्षक सागर शिंदे, दीपक साळवी, भालचंद्र मयेकर आणि निलेश शिंगावे यांनी सक्रिय भूमिका बजावली.
दरम्यान, परराज्यातील गंभीर गुन्ह्यातील फरार आरोपींना शोधून काढून अटक केल्यामुळे रत्नागिरी पोलिसांच्या कार्यक्षमतेचे पुन्हा एकदा दर्शन घडले असून या धाडसी कारवाईचे सर्वत्र कौतुक होत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
