देवरुख शहरात फायनान्स कंपनीने कायदेशीर प्रक्रियेद्वारे ताब्यात घेतलेल्या आणि सील केलेल्या घराचे कुलूप तोडून पुन्हा बेकायदेशीररीत्या ताबा घेतल्याचा प्रकार उघडकीस आला आहे. श्रीराम फायनान्स कंपनीच्या मालकीच्या ताब्यात असलेल्या या घराचे सील तोडून मालमत्तेत अनधिकृत प्रवेश केल्याप्रकरणी कर्जदार सागर रघुनाथ फटकरे यांच्यासह एका महिला संशयिताविरोधात देवरुख पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, श्रीराम फायनान्स कंपनीच्या रत्नागिरी शाखेकडून आरोपींनी ५० लाख रुपयांचे कर्ज घेतले होते. या कर्जाच्या सुरक्षिततेसाठी देवरुख नगरपंचायत हद्दीतील घर क्रमांक २/१२५ए आणि संबंधित जागा कंपनीकडे तारण ठेवण्यात आली होती. मात्र, कर्जाची नियमित परतफेड न झाल्याने कंपनीकडून कायदेशीर प्रक्रिया राबविण्यात आली.
या प्रक्रियेदरम्यान अतिरिक्त मुख्य न्यायदंडाधिकारी, रत्नागिरी यांच्या आदेशानुसार ७ मार्च २०२६ रोजी संबंधित मालमत्तेचा ताबा श्रीराम फायनान्स कंपनीला देण्यात आला होता. यावेळी अधिकृत पंचनामा करण्यात आला. तसेच घराला कुलूप लावून सील करण्यात आले होते. त्यामुळे संबंधित मालमत्तेचा ताबा कायदेशीररीत्या कंपनीकडे होता.
मात्र, कंपनीने ताबा घेतल्यानंतर काही महिन्यांनी या मालमत्तेत पुन्हा अनधिकृत प्रवेश केल्याचा प्रकार समोर आला. २६ ऑक्टोबर २०२६ रोजी सायंकाळी साडेपाच वाजण्याच्या सुमारास आरोपींनी सील केलेल्या घराच्या दरवाजाचे कुलूप आणि सील तोडल्याचा आरोप आहे. त्यानंतर घरात प्रवेश करून मालमत्तेचे नुकसान करण्यात आले आणि परस्पर घराचा ताबा घेतल्याचे फिर्यादीत नमूद करण्यात आले आहे.
विशेष म्हणजे, न्यायालयाच्या आदेशानुसार कंपनीने ताब्यात घेतलेल्या मालमत्तेचे सील तोडून पुन्हा घरात प्रवेश करण्यात आल्याने या प्रकरणाला कायदेशीरदृष्ट्या महत्त्व प्राप्त झाले आहे. लोकसेवकाने दिलेल्या कायदेशीर आदेशाचे उल्लंघन करून संबंधित घरात अनधिकृतरीत्या वास्तव्य करण्यात येत असल्याचेही तक्रारीत म्हटले आहे.
या प्रकरणी श्रीराम फायनान्स कंपनीचे मुखत्यारपत्रधारक सागर गणपत कांबळे यांनी देवरुख पोलीस ठाण्यात फिर्याद दिली. त्यानुसार ६ नोव्हेंबर २०२६ रोजी कर्जदार सागर रघुनाथ फटकरे आणि एका महिला संशयिताविरोधात भारतीय न्यायसंहिता २०२३ तसेच सरफेसी कायदा २००२ मधील विविध कलमांनुसार गुन्हा दाखल करण्यात आला आहे.
दरम्यान, ५० लाख रुपयांच्या कर्जाची परतफेड न झाल्यानंतर न्यायालयाच्या आदेशाने ताब्यात घेतलेल्या मालमत्तेचे सील तोडून पुन्हा ताबा घेण्याच्या या घटनेची देवरुख परिसरात चर्चा सुरू आहे. या प्रकरणात नेमके काय घडले, मालमत्तेचे किती नुकसान झाले आणि आरोपींनी कोणत्या परिस्थितीत घराचा ताबा घेतला, याबाबत पोलीस पुढील तपास करत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
