दापोली तालुक्यातील गिम्हवणे-सुतारवाडी येथे महिला बचत गटाच्या माध्यमातून जमा करण्यात आलेल्या कर्जाच्या हप्त्यांच्या रकमेसह सोन्याचे दागिने बँकेत गहाण ठेवून त्यातून मिळालेल्या पैशांचा अपहार केल्याचा गंभीर प्रकार समोर आला आहे. या प्रकरणी दापोली पोलीस ठाण्यात दोन जणांविरुद्ध फौजदारी पात्र गुन्हा दाखल करण्यात आला आहे. या प्रकरणातील एकूण अपहाराची रक्कम सुमारे ९ लाख ६० हजार रुपये असल्याचे फिर्यादीत नमूद करण्यात आले आहे.
या प्रकरणी गिम्हवणे-सुतारवाडी येथील ३८ वर्षीय महिलेने दापोली पोलीस ठाण्यात फिर्याद दिली आहे. त्यानुसार प्रतिज्ञा विश्वास देवघरकर (वय ३१) आणि विश्वास रमेश देवघरकर (वय ३८), दोघेही रा. गिम्हवणे-सुतारवाडी, ता. दापोली, जि. रत्नागिरी यांच्याविरुद्ध गुन्हा दाखल करण्यात आला आहे.
दापोली पोलीस ठाण्यात गुन्हा क्रमांक १६३/२०२६ नोंदवण्यात आला असून, भारतीय न्यायसंहिता अधिनियम २०२३ मधील कलम ३१६(२) आणि ३(५) अन्वये कारवाई करण्यात आली आहे. गुन्ह्याची नोंद १७ ऑगस्ट २०२६ रोजी रात्री ९.१६ वाजता करण्यात आली.
फिर्यादीच्या तक्रारीनुसार संशयित आरोपी क्रमांक एक आणि दोन यांनी फिर्यादीकडून १६ मे २०२६ रोजी परिधान करण्यासाठी विश्वासाने घेतलेले सुमारे सहा तोळे वजनाचे मंगळसूत्र परस्पर बँकेत गहाण ठेवले. या मंगळसूत्रावर कर्ज अथवा रक्कम उचलून मिळालेला पैसा स्वतःच्या फायद्यासाठी वापरल्याचा आरोप आहे.
तसेच फिर्यादींच्या भावकीतील अनुष्का उमेश देवघरकर यांच्या मालकीची सुमारे पाच ग्रॅम वजनाची सोन्याची कर्णफुले संशयित आरोपी क्रमांक एक हिने २३ एप्रिल २०२६ रोजी परिधान करण्यासाठी विश्वासाने घेतली होती. ही कर्णफुलेही संबंधित महिलेच्या परवानगीशिवाय बँकेत गहाण ठेवून त्यातून मिळालेली रक्कम स्वतःच्या फायद्यासाठी वापरल्याचा आरोप करण्यात आला आहे.
या प्रकरणात महिला बचत गटाशी संबंधित आर्थिक व्यवहारांचाही मुद्दा समोर आला आहे. संशयित आरोपी क्रमांक एक हिची विश्वकर्मा समूह महिला मंडळ बचत गटाच्या सचिवपदी नियुक्ती करण्यात आली होती. बचत गटातील महिलांनी घेतलेल्या कर्जाचे हप्ते वेळोवेळी गोळा करून ते बँकेत जमा करण्याची जबाबदारी तिच्यावर सोपवण्यात आली होती.
मात्र, फिर्यादीसह बचत गटातील १२ महिलांकडून कर्जाच्या हप्त्यांसाठी सुमारे ४ लाख ६० हजार रुपये जमा करण्यात आले. ही रक्कम संबंधित बँक खात्यात जमा करण्याऐवजी संशयित आरोपीने स्वतःच्या फायद्यासाठी वापरल्याचा आरोप तक्रारीत करण्यात आला आहे.
पाच लाखांची रक्कमही बँकेत जमा न केल्याचा आरोप
याशिवाय एचडीएफसी बँकेमार्फत महिला बचत गटाच्या माध्यमातून सुमारे १० लाख रुपयांचे कर्ज घेण्यात आले होते. या कर्जाच्या परतफेडीसाठी फिर्यादीसह इतर महिलांनी आरोपी क्रमांक एक हिच्याकडे विश्वासाने सुमारे पाच लाख रुपये जमा केले होते.
कर्जाचे हप्ते वेळेत भरण्यासाठी दिलेली ही रक्कमही बँकेत जमा न करता स्वतःच्या फायद्यासाठी वापरल्याचा आरोप आहे. त्यामुळे बचत गटातील महिलांवर कर्जाच्या परतफेडीचा आर्थिक भार निर्माण झाल्याचे तक्रारीत नमूद करण्यात आले आहे.
एकूण ९ लाख ६० हजारांच्या अपहाराचा आरोप
सोन्याचे दागिने विश्वासाने घेऊन ते बँकेत गहाण ठेवणे, तसेच महिला बचत गटातील सदस्यांकडून कर्जाच्या हप्त्यांसाठी जमा करण्यात आलेली रक्कम बँकेत न भरता स्वतःच्या फायद्यासाठी वापरणे, अशा विविध प्रकारांतून एकूण सुमारे ९ लाख ६० हजार रुपयांचा अपहार झाल्याचा आरोप फिर्यादीने केला आहे.
या प्रकरणी दापोली पोलीस ठाण्यात गुन्हा दाखल करण्यात आला असून, संबंधित आर्थिक व्यवहार, बँकेत गहाण ठेवण्यात आलेले दागिने, बचत गटाच्या खात्यांमधील व्यवहार आणि आरोपींकडे जमा झालेल्या रकमेचा वापर याबाबत पोलीस तपास करत आहेत.
दरम्यान, या प्रकरणातील आरोप हे फिर्यादीत नमूद केलेल्या माहितीनुसार असून, तपासाअंती वस्तुस्थिती आणि संबंधितांची कायदेशीर जबाबदारी स्पष्ट होणार आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
