मंडणगड | कोकण कट्टा न्यूज
मंडणगड तालुक्यातील पाचरळ गावात नळ पाणीपुरवठा योजनेचा प्रश्न गंभीर बनला असून, मुख्य जलवाहिनी फुटल्याने गेल्या तीन महिन्यांपासून सुमारे १५ घरांतील ग्रामस्थांना पाण्याविना राहावे लागत असल्याचा आरोप ग्रामस्थांनी केला आहे. जलवाहिनी दुरुस्ती आणि पाणीपुरवठा पूर्ववत करण्यासाठी तातडीने उपाययोजना करण्याची मागणी होत आहे.
गावातील नळ पाणीपुरवठा योजना गेल्या अनेक महिन्यांपासून विस्कळीत असल्याने नागरिकांना पाण्यासाठी अडचणींचा सामना करावा लागत आहे. मुख्य जलवाहिनी फुटून तीन महिने उलटले, तरीही समस्या कायम असल्याचे ग्रामस्थांचे म्हणणे आहे. त्यामुळे संबंधित यंत्रणेच्या कार्यपद्धतीबाबत नाराजी व्यक्त केली जात आहे.
विद्यार्थ्यांनाही पाण्यासाठी करावी लागते कसरत!
या पाणीटंचाईचा परिणाम लहान मुलांच्या दैनंदिन जीवनावरही होत आहे. मराठी शाळेतील विद्यार्थ्यांना घरातून पाणी घेऊन जावे लागत असल्याचे सांगण्यात आले. पिण्याच्या पाण्यासारख्या मूलभूत सुविधेसाठी विद्यार्थ्यांना आणि ग्रामस्थांना त्रास सहन करावा लागत असल्याने या समस्येवर तातडीने तोडगा काढण्याची गरज व्यक्त होत आहे.
दरम्यान, गावातील पिण्याच्या पाण्याच्या विहिरीला अद्याप सुरक्षा जाळी बसवण्यात आलेली नसल्याने अपघाताचा धोका निर्माण झाल्याची बाबही ग्रामस्थांनी निदर्शनास आणून दिली आहे.
काही घरांना नळजोडणीच नाही!
ज्येष्ठ नागरिक सहदेव कातळे यांनी ग्रामस्थांच्या वतीने गावातील पाणीसमस्येबाबत व्यथा मांडली. सुलोचना चव्हाण, गणपत बामने आणि सुलभा गोवळे यांच्या घरांना अद्याप नळजोडणी देण्यात आलेली नसल्याचेही त्यांनी सांगितले. त्यामुळे गावातील पाणीपुरवठ्याच्या प्रश्नाकडे गांभीर्याने लक्ष देण्याची मागणी होत आहे.
राष्ट्रवादी काँग्रेसच्या पदाधिकाऱ्यांची पाहणी
या समस्येची माहिती मिळाल्यानंतर राष्ट्रवादी काँग्रेस पक्षाचे मंडणगडमधील ज्येष्ठ नेते भाईसाहेब आणि युवक तालुकाध्यक्ष साईराज सावंत यांनी प्रत्यक्ष पाचरळ गावाला भेट दिली. यावेळी त्यांनी ग्रामस्थांशी संवाद साधून त्यांच्या अडचणी आणि तक्रारी जाणून घेतल्या.
खासदार सुनील तटकरे यांच्या माध्यमातून या समस्येवर लवकरच ठोस कार्यवाही करण्यासाठी प्रयत्न केले जातील आणि ग्रामस्थांना दिलासा मिळवून देण्यात येईल, असे आश्वासन त्यांनी दिल्याचे सांगण्यात आले.
आता प्रशासन कधी जागे होणार?
पिण्याचे पाणी ही प्रत्येक नागरिकाची मूलभूत गरज आहे. त्यामुळे पाचरळ गावातील फुटलेली जलवाहिनी तातडीने दुरुस्त करून पाणीपुरवठा सुरळीत करावा, नळजोडणीपासून वंचित असलेल्या घरांना जोडण्या द्याव्यात आणि विहिरीला सुरक्षा जाळी बसवावी, अशी मागणी ग्रामस्थांकडून होत आहे. आता संबंधित प्रशासन या प्रश्नाची दखल घेऊन किती लवकर कार्यवाही करते, याकडे ग्रामस्थांचे लक्ष लागले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
