संगमेश्वर तालुक्यातील रत्नागिरी-नागपूर महामार्गावरील आंबा घाटात आज पहाटे भीषण अपघात घडला. गोवरेवाडी बसथांब्याजवळ भरधाव रिक्षा अपघातग्रस्त होऊन चालक गंभीर जखमी झाल्याने परिसरात एकच खळबळ उडाली. या अपघातामुळे काही काळ वाहतुकीवरही परिणाम झाला होता.
मिळालेल्या माहितीनुसार, सुरेश शामराव साळोखे (वय ६६, रा. कोल्हापूर) हे आपल्या ताब्यातील रिक्षा (क्र. MH 09 EL 2608) घेऊन कोल्हापूरहून गणपतीपुळेकडे निघाले होते. रिक्षामध्ये पेढ्यांचे बॉक्स भरलेले होते. गणपतीपुळे परिसरातील दुकानदारांना हा माल पोहोचवण्यासाठी ते पहाटेच्या सुमारास प्रवास करत होते.
आज पहाटे चार ते पाच वाजण्याच्या दरम्यान रिक्षा गोवरेवाडी बसथांब्याजवळ आली असता अचानक भीषण अपघात झाला. अपघाताचा जोर इतका मोठा होता की रिक्षा रस्त्याच्या कडेला पलटी झाली आणि चालक सुरेश साळोखे हे रिक्षाखाली अडकून पडले. घटनास्थळी पेढ्यांचे बॉक्स विखुरलेले दिसून आले.
अपघाताचे नेमके कारण अद्याप स्पष्ट झालेले नसले तरी अज्ञात वाहनाने धडक दिल्याने रिक्षाचालकाचे नियंत्रण सुटून हा अपघात झाल्याचा प्राथमिक अंदाज व्यक्त करण्यात येत आहे. घाट परिसरात असलेले धोकादायक वळण, पहाटेची कमी दृश्यमानता आणि वेग हेही अपघातामागील संभाव्य कारण मानले जात आहे.
घटनेची माहिती मिळताच साखरपा दूरक्षेत्राचे सहाय्यक पोलीस फौजदार शांताराम पंदेरे, महिला पोलीस हेड कॉन्स्टेबल मनस्वी पावसकर आणि कॉन्स्टेबल तानाजी पाटील यांनी तातडीने घटनास्थळी धाव घेतली. स्थानिक नागरिकांच्या मदतीने जखमी चालकाला रिक्षाखालून बाहेर काढण्यात आले. त्यानंतर त्यांना तातडीने साखरपा प्राथमिक आरोग्य केंद्रात दाखल करण्यात आले.
मात्र चालकाची प्रकृती गंभीर असल्याने वैद्यकीय अधिकाऱ्यांनी त्यांना पुढील उपचारासाठी रत्नागिरी येथे हलविण्याचा निर्णय घेतला. सध्या त्यांच्यावर उपचार सुरू असून प्रकृती चिंताजनक असल्याची माहिती मिळत आहे.
दरम्यान, साखरपा पोलिसांनी घटनास्थळी पंचनामा करून अपघाताचा अधिक तपास सुरू केला आहे. अज्ञात वाहनाचा शोध घेण्याचे कामही पोलिसांकडून सुरू करण्यात आले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
