लांजा लुक्यातील बौद्धवाडी परिसरात जुन्या वादातून एका तरुणीला घरात घुसून मारहाण केल्याची गंभीर घटना घडली असून या प्रकरणी तीन महिलांविरोधात लांजा पोलीस ठाण्यात गुन्हा दाखल करण्यात आला आहे. या घटनेमुळे परिसरात मोठी खळबळ उडाली असून नागरिकांमध्ये भीतीचे वातावरण निर्माण झाले आहे.
पोलिसांनी दिलेल्या माहितीनुसार, सुगंधा कांबळे, सुप्रिया कांबळे आणि शुभांगी कांबळे (सर्व रा. बौद्धवाडी, लांजा, जि. रत्नागिरी) अशी गुन्हा दाखल झालेल्या संशयित महिलांची नावे आहेत. सोमवार, १८ मे रोजी सायंकाळी साडेपाच वाजण्याच्या सुमारास ही घटना घडली.
या संदर्भात २२ वर्षीय पीडित तरुणीने लांजा पोलीस ठाण्यात अधिकृत फिर्याद दिली आहे. फिर्यादीत नमूद केल्यानुसार, संबंधित तरुणी त्या दिवशी आपल्या घरात एकटीच होती. याचवेळी जुन्या वादाचा राग मनात धरून संशयित महिला तिच्या घरात जबरदस्तीने शिरल्या.
घरात प्रवेश करताच तिन्ही महिलांनी तरुणीला अश्लील भाषेत शिवीगाळ करण्यास सुरुवात केली. काही क्षणांतच वाद विकोपाला गेला आणि त्यांनी तरुणीला जमिनीवर ढकलून लाथाबुक्क्यांनी बेदम मारहाण केली. एवढ्यावरच न थांबता घरातील लाकडी काठी उचलून तिच्या पाठीवर तसेच हातापायांवर जोरदार प्रहार करण्यात आले.
या मारहाणीत तरुणीला गंभीर दुखापत झाली असून तिला अंतर्गत मार लागल्याची माहिती पोलिसांनी दिली आहे. मारहाणीमुळे घाबरलेल्या तरुणीने आरडाओरड केल्यानंतर शेजारी घटनास्थळी धावून आले. नागरिक येताना पाहून संशयित महिलांनी पीडितेला जीवे मारण्याची धमकी दिली आणि तेथून पळ काढला.
घटनेनंतर पीडित तरुणीने लांजा पोलीस ठाण्यात धाव घेत तक्रार दाखल केली. तिच्या तक्रारीवरून पोलिसांनी तिन्ही महिलांविरोधात विविध कलमान्वये गुन्हा नोंदवला असून या प्रकरणाचा पुढील तपास सुरू आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
