दापोली तालुक्यातील टाळसुरे येथील संतोषीमाता नगर परिसरात एका वृद्ध महिलेचा बंद घरामध्ये कुजलेल्या अवस्थेतील मृतदेह आढळून आल्याने परिसरात मोठी खळबळ उडाली आहे. सुवर्णा महादेव रीसबुड (वय ७६) असे मृत महिलेचे नाव असून त्या घरात एकट्याच राहत होत्या. या घटनेमुळे परिसरात हळहळ व्यक्त होत असून एकट्याने राहणाऱ्या ज्येष्ठ नागरिकांच्या सुरक्षिततेचा मुद्दा पुन्हा चर्चेत आला आहे.
मिळालेल्या माहितीनुसार, सुवर्णा रीसबुड या संतोषीमाता नगर येथील आपल्या राहत्या घरात एकट्याच वास्तव्याला होत्या. शांत आणि मितभाषी स्वभावामुळे त्या परिसरातील नागरिकांना परिचित होत्या. मात्र गेल्या चार दिवसांपासून त्या घराबाहेर दिसत नसल्याने शेजाऱ्यांना संशय आला होता. नेहमीप्रमाणे घराबाहेर हालचाल न दिसल्याने नागरिकांनी त्यांच्या घराजवळ जाऊन चौकशी करण्याचा प्रयत्न केला.
शेजाऱ्यांनी दरवाजाजवळ जाऊन अनेकदा हाका मारल्या, मात्र आतून कोणताही प्रतिसाद मिळाला नाही.
त्याचवेळी घराच्या खिडकीतून तीव्र आणि उग्र दुर्गंधी येत असल्याचे त्यांच्या लक्षात आले. त्यामुळे परिसरातील नागरिकांमध्ये भीतीचे वातावरण निर्माण झाले. अनर्थ घडल्याची शक्यता लक्षात घेऊन गावचे पोलीस पाटील विजय सपकाळ तसेच शेजारी मंदार जुवेकर यांना याबाबत माहिती देण्यात आली.
माहिती मिळताच विजय सपकाळ आणि मंदार जुवेकर यांनी तातडीने घटनास्थळी धाव घेतली. घराचा मुख्य दरवाजा आतून बंद असल्याने त्यांनी दरवाजा तोडून घरात प्रवेश केला. घरामध्ये प्रवेश करताच दुर्गंधी अधिक तीव्र झाली. बेडरूममध्ये खाटेजवळ सुवर्णा रीसबुड यांचा मृतदेह कुजलेल्या अवस्थेत पडलेला आढळून आला. मृतदेहाची अवस्था पाहता काही दिवसांपूर्वीच त्यांचा मृत्यू झाला असावा, असा प्राथमिक अंदाज व्यक्त करण्यात येत आहे.
घटनेची माहिती मिळताच दापोली पोलीस ठाणे येथील पोलिसांनी घटनास्थळी धाव घेत पंचनामा केला. परिसरातील नागरिकांकडून माहिती घेत मृत्यूबाबतची प्राथमिक चौकशी करण्यात आली. मृत महिलेच्या नातेवाईकाने दिलेल्या खबरीवरून बी.एन.एस.एस. कलम १९४ अन्वये अकस्मात मृत्यूची नोंद करण्यात आली आहे.
पोलिसांनी मृतदेह ताब्यात घेऊन शवविच्छेदनासाठी पाठवला असून, शवविच्छेदन अहवालानंतर मृत्यूचे नेमके कारण स्पष्ट होणार आहे. सध्या तरी हा नैसर्गिक मृत्यू असावा, असा प्राथमिक अंदाज व्यक्त केला जात असला तरी पोलिसांकडून सर्व बाजूंनी तपास सुरू आहे.
या घटनेमुळे संतोषीमाता नगर परिसरात शोककळा पसरली आहे. एकट्याने राहणाऱ्या वृद्ध नागरिकांची नियमित चौकशी आणि देखभाल करण्याची गरज असल्याची भावना परिसरातील नागरिकांनी व्यक्त केली.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
