अवकाळी हवामानाचा फटका पुन्हा एकदा कोकणातील शेतकऱ्यांना बसला असून दाभोळ परिसरात आंबा व काजू बागांचे मोठ्या प्रमाणात नुकसान झाल्याचे चित्र समोर आले आहे. अवकाळी थंडी, अचानक झालेली गारपीट आणि त्यानंतर वाढलेली उन्हाची तीव्रता या तिन्ही घटकांच्या एकत्रित परिणामामुळे फळबागांचे उत्पादन धोक्यात आले आहे.
या पार्श्वभूमीवर कृषी विभागाने तत्काळ हालचाली करत नुकसानग्रस्त बागांचे पंचनामे युद्धपातळीवर सुरू केले आहेत. संबंधित अधिकारी व कर्मचारी प्रत्यक्ष शेतात जाऊन पाहणी करत असून झाडांची अवस्था, गळलेली फळे, तसेच एकूण उत्पादनातील घट याची नोंद घेतली जात आहे. शासनाकडे अचूक अहवाल सादर करून शेतकऱ्यांना लवकरात लवकर मदत मिळवून देणे हा या मोहिमेचा मुख्य उद्देश आहे.
सहाय्यक कृषी अधिकारी शुभंकर यादव यांनी शेतकऱ्यांना सहकार्याचे आवाहन केले आहे. ज्या शेतकऱ्यांच्या आंबा व काजू बागांचे नुकसान झाले आहे त्यांनी पंचनाम्यासाठी आवश्यक कागदपत्रे तयार ठेवावीत तसेच अधिकाऱ्यांना प्रत्यक्ष पाहणीदरम्यान पूर्ण सहकार्य करावे, असे त्यांनी स्पष्ट केले. वेळेत आणि अचूक पंचनामे पूर्ण होणे अत्यंत गरजेचे असल्यामुळे शेतकऱ्यांनी कृषी विभागाशी सतत संपर्कात राहावे, असेही त्यांनी नमूद केले.
दरम्यान, बदलत्या हवामानाचा परिणाम केवळ आंबा आणि काजू बागांपुरता मर्यादित नसून नारळ व सुपारी बागांनाही मोठा फटका बसल्याचे शेतकऱ्यांचे म्हणणे आहे. त्यामुळे या पिकांचाही पंचनामा करून संबंधित शेतकऱ्यांना शासनाकडून मदत मिळावी, अशी जोरदार मागणी होत आहे.
कृषी विभागाच्या या तातडीच्या उपक्रमामुळे नुकसानग्रस्त शेतकऱ्यांना काही प्रमाणात दिलासा मिळण्याची अपेक्षा व्यक्त केली जात आहे. मात्र, वाढत्या हवामान बदलामुळे फळबागांसमोरील संकट अधिक गंभीर होत असून दीर्घकालीन उपाययोजनांची गरजही अधोरेखित होत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
