दापोली येथे सायबर फसवणुकीतून मिळालेली रक्कम स्वीकारण्यासाठी स्वतःचे बँक खाते उपलब्ध करून देत आर्थिक व्यवहारांना मदत केल्याचा गंभीर प्रकार दापोलीत उघडकीस आला आहे. देशभरातील विविध सायबर गुन्ह्यांमध्ये फसवणुकीची रक्कम स्वीकारण्यासाठी युनियन बँक ऑफ इंडियाच्या एका खात्याचा वापर करण्यात आल्याचे तपासात निष्पन्न झाले असून, याप्रकरणी अज्ञात आरोपीविरुद्ध दापोली पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, १० जानेवारी २०२६ ते आजपर्यंतच्या कालावधीत संबंधित खातेदाराने सायबर गुन्ह्यांतून मिळालेली रक्कम स्वीकारण्यासाठी आपले बँक खाते उपलब्ध करून दिले. या खात्यामध्ये विविध सायबर फसवणुकीतील पैसे जमा करण्यात आले. त्यानंतर ही रक्कम इतर बँक खात्यांमध्ये वर्ग करण्यासाठी संबंधित खातेदाराने आपल्या साथीदाराला परवानगी दिल्याचेही प्राथमिक तपासातून समोर आले आहे.
सायबर गुन्ह्यांमध्ये अनेकदा फसवणुकीची रक्कम थेट मुख्य आरोपीच्या खात्यात न जाता अशा तृतीय पक्षांच्या खात्यांमध्ये जमा केली जाते. त्यानंतर ती रक्कम विविध खात्यांमध्ये किंवा डिजिटल माध्यमातून तातडीने वर्ग केली जाते. या प्रकारामुळे तपास यंत्रणांना आरोपींपर्यंत पोहोचण्यात अडचणी निर्माण होतात. दापोलीत उघडकीस आलेले हे प्रकरणही अशाच प्रकारच्या आर्थिक साखळीचा भाग असल्याचा संशय व्यक्त करण्यात येत आहे.
या प्रकरणी असंतोष चव्हाण यांनी दिलेल्या फिर्यादीवरून १९ जुलै २०२६ रोजी रात्री ९.१० वाजता दापोली पोलीस ठाण्यात भारतीय न्याय संहिता (बीएनएस) २०२३ मधील कलम ३१८(४) व ३१९(२) तसेच माहिती तंत्रज्ञान अधिनियम, २००० मधील कलम ६६(ई) अंतर्गत अज्ञात आरोपीविरुद्ध गुन्हा दाखल करण्यात आला आहे.
संबंधित बँक खात्यातील व्यवहार, लाभार्थी खात्यांची माहिती, पैशांचा प्रवाह आणि या रॅकेटमध्ये सहभागी असलेल्या इतर व्यक्तींचा शोध घेण्यासाठी पोलिसांकडून सखोल तपास सुरू आहे. सायबर फसवणुकीतील आर्थिक व्यवहारांची साखळी उलगडण्यासाठी तांत्रिक माहिती, बँक व्यवहारांचे तपशील आणि डिजिटल पुराव्यांच्या आधारे तपासाची चक्रे वेगाने फिरत असल्याची माहिती पोलिसांनी दिली आहे.
दरम्यान, कोणत्याही अनोळखी व्यक्तीला कमिशन किंवा आर्थिक मोबदल्याच्या आमिषाने स्वतःचे बँक खाते वापरण्यास देऊ नये, अन्यथा अशा व्यवहारांमध्ये सहभागी आढळल्यास कायदेशीर कारवाईला सामोरे जावे लागू शकते, असे आवाहन पोलिसांकडून करण्यात आले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
