रत्नागिरी तालुक्यातील पाली मराठवाडी येथे भरदिवसा घरफोडीची घटना उघडकीस आली आहे. घर बंद असल्याची संधी साधून अज्ञात चोरट्यांनी घराचे कुलूप तोडून आत प्रवेश केला आणि कपाटातील सोन्या-चांदीचे तब्बल ६ लाख ८० हजार रुपये किमतीचे दागिने चोरून नेले. बुधवारी (७ ऑक्टोबर) दुपारी साडेबारा ते पावणेदोनच्या दरम्यान ही घटना घडली. या प्रकरणी रत्नागिरी ग्रामीण पोलीस ठाण्यात अज्ञात चोरट्याविरोधात गुन्हा दाखल करण्यात आला असून, पोलिसांकडून पुढील तपास सुरू आहे.
पोलिसांनी दिलेल्या माहितीनुसार, मीनाक्षी अविनाश जाधव (वय ४५, रा. पाली मराठवाडी, ता. जि. रत्नागिरी) या बुधवारी गावातील आठवडा बाजारात भाजीपाला आणि घरातील आवश्यक वस्तू खरेदी करण्यासाठी गेल्या होत्या. त्या वेळी घरात कोणीही नसल्याची संधी साधून अज्ञात चोरट्याने घराच्या मागील बाजूस असलेल्या लोखंडी गेटचे कुलूप तोडून आत प्रवेश केला.
त्यानंतर चोरट्याने घरातील आतील दरवाजाचे बिजागर तोडून बेडरूममध्ये प्रवेश केला. तेथील लोखंडी गोदरेज कपाटाचे लॉकर उचकटून त्यामध्ये ठेवलेले सोन्या-चांदीचे दागिने चोरून नेले. अवघ्या काही वेळात चोरट्याने लाखो रुपयांचा ऐवज लंपास केल्याने परिसरात खळबळ उडाली आहे.
सोन्याच्या दागिन्यांसह चांदीचे पैंजणही चोरीला
या घरफोडीत सुमारे ४ लाख १५ हजार रुपये किमतीच्या पाच तोळे वजनाच्या सोन्याच्या प्लेन पाटल्या, ७० हजार रुपये किमतीचे पाच ग्रॅम वजनाचे सोन्याचे वळे, ६० हजार रुपये किमतीची पांढऱ्या खड्याची सोन्याची अंगठी, ७० हजार रुपये किमतीचे सोन्याच्या वाट्या व मणी असलेले दोन पदरी मंगळसूत्र, गुलाबी खडा असलेला सोन्याचा बदाम, ३२ हजार रुपये किमतीच्या सोन्याच्या रिंगा, १६ हजार रुपये किमतीची सोन्याची वेल, सोन्याची नथ तसेच सात हजार रुपये किमतीचे चांदीचे पैंजण व जोडवी असा एकूण ६ लाख ८० हजार रुपयांचा ऐवज चोरीला गेल्याचे फिर्यादीत नमूद करण्यात आले आहे.
घरी परतल्यानंतर चोरी उघड
भाजीपाला आणि घरातील वस्तूंची खरेदी करून मीनाक्षी जाधव घरी परतल्या असता, घराच्या मागील बाजूच्या गेटचे कुलूप तोडल्याचे त्यांच्या निदर्शनास आले. घरातील दरवाजा आणि कपाटाचे लॉकर उचकटलेले असल्याचे तसेच लॉकरमध्ये ठेवलेले दागिने गायब असल्याचे लक्षात येताच त्यांनी तातडीने पोलिसांना माहिती दिली.
या घटनेनंतर रत्नागिरी ग्रामीण पोलिसांनी घटनास्थळी जाऊन पाहणी केली. अज्ञात चोरट्याविरोधात भारतीय न्याय संहितेच्या कलम ३३१(३) आणि ३०५(अ) अन्वये गुन्हा दाखल करण्यात आला आहे.
पाली मराठवाडी येथे भरदिवसा घडलेल्या या घरफोडीमुळे परिसरातील नागरिकांमध्ये चिंता व्यक्त होत आहे. घर बंद करून बाहेर जाताना नागरिकांनी सुरक्षिततेची काळजी घेण्याचे महत्त्व या घटनेतून अधोरेखित झाले आहे. दरम्यान, चोरीतील दागिन्यांचा शोध घेणे आणि संबंधित चोरट्यांचा छडा लावणे यासाठी पोलिसांचा तपास सुरू आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
