व्हॉट्सॲप ग्रुपवर टाकलेल्या पोस्टचा राग मनात धरून रत्नागिरीतील मिरजोळे एमआयडीसी परिसरात एका दिव्यांग कर्मचाऱ्याला मारहाण केल्याची घटना समोर आली आहे. या प्रकरणी रत्नागिरी ग्रामीण पोलीस ठाण्यात चार जणांसह एका अनोळखी महिलेविरुद्ध गुन्हा दाखल करण्यात आला असून, पोलीस पुढील तपास करत आहेत.
पोलिसांत दाखल तक्रारीनुसार, नाचणे येथील शांतीनगरमधील नवलाई संकुलात राहणारे श्रीकृष्णा देविदास शिर्सेकर (वय ४३) हे कर्णबधीर असून त्यांना दृष्टीदोषही आहे. ते मिरजोळे एमआयडीसीतील ‘स्टील आर्ट इंडस्ट्रीज’ (डी-१२) येथे नोकरी करतात. त्यांनी समाजमाध्यमावरील ‘पंचक्रोशी समाचार’ या व्हॉट्सॲप ग्रुपवर एक पोस्ट टाकली होती. या पोस्टवरून संशयित आरोपी आणि त्यांच्यात वाद निर्माण झाल्याचे तक्रारीत नमूद आहे.
याच वादातून बुधवारी दुपारी सुमारे १२ वाजण्याच्या सुमारास संशयितांनी कंपनीच्या गेटमधून आत प्रवेश केला. त्यानंतर शिर्सेकर यांना शिवीगाळ करत हाताने तसेच लाथाबुक्क्यांनी मारहाण केल्याचा आरोप आहे. या घटनेत त्यांच्या चष्म्याचे नुकसान झाले असून ते जखमी झाल्याचे तक्रारीत म्हटले आहे.
या प्रकरणी सिद्धी विनायक शिर्सेकर, साक्षी शशांक शिरवडकर, शशांक विजय शिरवडकर, राहुल जगदीश करगुटकर (सर्व रा. जैतापूर, ता. राजापूर, जि. रत्नागिरी) आणि एका अनोळखी महिलेविरुद्ध तक्रार दाखल करण्यात आली आहे.
या तक्रारीच्या आधारे पोलिसांनी भारतीय न्याय संहिता २०२३ मधील कलम १८९(२), १९१(२), ११५(२), ३२४(२) तसेच दिव्यांग व्यक्ती हक्क अधिनियम २०१६ मधील कलम ९२(ब) अन्वये गुन्हा नोंदवला आहे. या प्रकरणाचा पुढील तपास रत्नागिरी ग्रामीण पोलीस करत आहेत.
सोशल मीडियावरील पोस्टवरून निर्माण झालेला वाद प्रत्यक्ष मारहाणीपर्यंत पोहोचल्याने या घटनेची चर्चा सुरू आहे. मात्र, प्रकरणातील आरोपांची सत्यता तपासाअंती स्पष्ट होणार आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
