रत्नागिरी : कोकण रेल्वेमार्गावर अवैध मद्य तस्करीविरोधात सुरू असलेल्या मोहिमेला मोठे यश मिळाले असून, रेल्वे सुरक्षा दल (RPF) आणि सी अँड आय विभागाच्या संयुक्त कारवाईत जनशताब्दी एक्स्प्रेसमध्ये मोठ्या प्रमाणावर मद्यसाठा जप्त करण्यात आला आहे. या प्रकरणी दोन प्रवाशांना रंगेहात पकडून अटक करण्यात आली आहे.
मडगाव ते मुंबई छत्रपती शिवाजी महाराज टर्मिनस या मार्गावर धावणारी जनशताब्दी एक्स्प्रेस (गाडी क्र. १२०५२) रत्नागिरी स्थानकावर थांबली असताना ही कारवाई करण्यात आली. नियमित तपासणी आणि गस्तीदरम्यान पथकाचे लक्ष काही प्रवाशांच्या संशयास्पद हालचालींकडे गेले. त्यानंतर संबंधित दोघांना ताब्यात घेऊन त्यांच्या सामानाची सखोल झडती घेण्यात आली.
झडतीदरम्यान त्यांच्या बॅगांमधून विविध प्रकारच्या एकूण १९१ दारूच्या बाटल्या आढळून आल्या. या बाटल्या नियमबाह्य पद्धतीने वाहतूक केल्या जात असल्याचे स्पष्ट झाल्यानंतर संपूर्ण साठा तात्काळ जप्त करण्यात आला. प्राथमिक तपासात हा मद्यसाठा कोकणमार्गे मुंबईकडे विक्रीसाठी नेला जात असल्याची शक्यता व्यक्त केली जात आहे.
कोकण रेल्वेमार्गावरून होणाऱ्या अवैध वाहतुकीवर आळा घालण्यासाठी रेल्वे सुरक्षा दलाकडून सातत्याने विशेष मोहीम राबवली जात आहे. याअंतर्गत विविध स्थानकांवर अचानक तपासण्या, गस्त आणि प्रवाशांच्या सामानाची तपासणी केली जात आहे. या मोहिमेमुळे अशा प्रकारच्या तस्करीच्या घटनांना आळा बसत असल्याचे अधिकाऱ्यांनी सांगितले.
या कारवाईनंतर रेल्वे प्रशासनाने प्रवाशांना स्पष्ट इशारा दिला आहे की, रेल्वे प्रवासादरम्यान कोणत्याही प्रकारच्या प्रतिबंधित वस्तू, मद्य किंवा अमली पदार्थांची वाहतूक करणे हा कायद्याने गुन्हा आहे. नियमांचे उल्लंघन करणाऱ्यांविरुद्ध कडक कारवाई करण्यात येईल, असेही प्रशासनाने अधोरेखित केले आहे.
अटक करण्यात आलेल्या दोन्ही आरोपींविरोधात संबंधित कायद्यांनुसार गुन्हा नोंदवून पुढील तपास सुरू करण्यात आला आहे. या प्रकरणात आणखी कोणाचा सहभाग आहे का, याचाही तपास यंत्रणा करत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
