लांजा ते दाभोळे मार्गावरील कुरचुंब फाटा येथे बोलेरो पिकअपमधून दोन बैलांची दाटीवाटीने आणि वाहतूक नियमांचे उल्लंघन करून वाहतूक केली जात असल्याचा प्रकार लांजा पोलिसांनी उघडकीस आणला. पोलिसांनी दोन्ही बैलांची सुटका करून पिकअप वाहनासह एकूण २ लाख ७१ हजार रुपयांचा मुद्देमाल जप्त केला. याप्रकरणी दोन संशयितांविरुद्ध गुन्हा दाखल करण्यात आला आहे.
सत्यजित गंगाराम कोलापटे (वय २३, रा. आंबा मानोलीजवळ धनगरवाडी, ता. शाहूवाडी, जि. कोल्हापूर) आणि सुरेश धोंडीबा बरागडे (वय ३३, रा. चांदोली, ता. शाहूवाडी, जि. कोल्हापूर) अशी गुन्हा दाखल झालेल्या संशयितांची नावे आहेत. पोलिसांच्या माहितीनुसार, सुरेश बरागडे याच्याविरुद्ध यापूर्वी देवरूख पोलीस ठाण्यात प्राण्यांचा छळ आणि बेकायदेशीर वाहतुकीसंदर्भात गुन्हा दाखल असल्याची नोंद आहे.
कुरचुंब फाट्यावर संशयास्पद पिकअप आढळले
लांजा पोलीस ठाण्याचे पोलीस कॉन्स्टेबल शिवाजी कळंत्रे हे पोलीस पथकासह गस्तीवर होते. यावेळी लांजा-दाभोळे मार्गावरील कुरचुंब फाटा येथे एमएच ०९ जीजे २८२५ क्रमांकाचे बोलेरो पिकअप वाहन संशयास्पदरीत्या जाताना पोलिसांच्या निदर्शनास आले.
पोलिसांनी वाहन थांबवून त्याची तपासणी केली असता वाहनाच्या हौद्यामध्ये दोन बैल अत्यंत दाटीवाटीने बांधून ठेवल्याचे आढळून आले. बैलांना हालचाल करता येऊ नये अशा पद्धतीने आखूड दोरीने बांधण्यात आले होते.
ताडपत्रीने हौदा बंद; जनावरांसाठी हवा खेळती राहण्याचीही व्यवस्था नाही
वाहनाचा हौदा चारही बाजूंनी ताडपत्रीने बंद करण्यात आला होता. त्यामुळे वाहनामध्ये जनावरांसाठी पुरेशी हवा खेळती राहण्याची व्यवस्था नसल्याचे पोलिसांच्या तपासणीत आढळले.
तसेच वाहतुकीदरम्यान जनावरांना दुखापत होऊ नये यासाठी वाहनामध्ये आवश्यक पार्टीशन करण्यात आलेले नव्हते. बैलांसाठी चारा आणि पाण्याची व्यवस्था नसल्याचेही पोलिसांच्या निदर्शनास आले. प्रथमोपचाराची कोणतीही सुविधा उपलब्ध नसल्याचेही तपासणीत समोर आले.
आवश्यक कागदपत्रे आणि फलकही नव्हता
जनावरांची वैद्यकीय तपासणी करून आवश्यक प्रमाणपत्र घेण्यात आलेले नसल्याचेही पोलिसांनी नमूद केले आहे. त्याचबरोबर वाहनावर गुरांची वाहतूक केली जात असल्याचा आवश्यक फलकही लावण्यात आलेला नव्हता.
या सर्व बाबींमुळे संबंधित बैलांची वाहतूक निर्धारित नियमांचे उल्लंघन करून केली जात असल्याचे पोलिसांच्या कारवाईत आढळून आले.
२.७१ लाखांचा मुद्देमाल जप्त
या कारवाईत पोलिसांनी प्रत्येकी १० हजार ५०० रुपये किमतीचे दोन बैल आणि २ लाख ५० हजार रुपये किमतीचा बोलेरो पिकअप टेम्पो असा एकूण २ लाख ७१ हजार रुपयांचा मुद्देमाल जप्त केला.
याप्रकरणी पोलीस कॉन्स्टेबल शिवाजी कळंत्रे यांच्या फिर्यादीवरून दोन्ही संशयितांविरुद्ध प्राण्यांचा छळ प्रतिबंधक कायदा, महाराष्ट्र पोलीस कायदा, प्राण्यांची वाहतूक नियम, मोटार वाहन कायदा तसेच भारतीय न्याय संहितेतील विविध कलमांनुसार गुन्हा दाखल करण्यात आला आहे.
तसेच भारतीय नागरिक सुरक्षा संहितेच्या कलम ३५(३) नुसार दोन्ही संशयितांना नोटीस बजावण्यात आली आहे.
घटनेची माहिती मिळताच लांजा पोलीस ठाण्याचे पोलीस निरीक्षक निळकंठ बगळे यांनी घटनास्थळी भेट देऊन पाहणी केली. या प्रकरणाचा पुढील तपास महिला पोलीस हेडकॉन्स्टेबल यू. यू. शेडे करीत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
