खेड शहरातील गजबजलेल्या महाडनाका परिसरात, भरणे रोडवरील एसटी डेपोसमोर असलेल्या सुप्रसिद्ध ‘स्मार्ट बाजार’ येथे गुरुवार, १५ ऑक्टोबर रोजी मध्यरात्री १ वाजून १८ मिनिटांच्या सुमारास आग लागल्याची घटना घडली. या आगीत स्मार्ट बाजाराच्या दर्शनी भागात ठेवलेला भाजीपाला जळून खाक झाला. खेड नगरपरिषदेच्या अग्निशमन दलाने तातडीने घटनास्थळी धाव घेत आगीवर नियंत्रण मिळवले. त्यामुळे आग लगतच्या दुकानांमध्ये पसरण्यापासून रोखण्यात यश आले.
मिळालेल्या प्राथमिक माहितीनुसार, स्मार्ट बाजाराच्या बाहेरील बाजूस विद्युत जोडणी असलेल्या ठिकाणी मोबाईल चार्जर लावण्यात आला होता. या ठिकाणी शॉर्टसर्किट झाल्याने आग लागली असावी, असा प्राथमिक अंदाज व्यक्त करण्यात येत आहे. आगीने काही वेळातच जोर पकडल्याने परिसरात धुराचे लोट पसरले आणि नागरिकांमध्ये घबराट निर्माण झाली.
घटनेची माहिती मिळताच खेड नगरपरिषदेच्या अग्निशमन दलाने तातडीने घटनास्थळी धाव घेतली. अग्निशमन दलाच्या जवानांनी पाण्याचा मारा करत आग आटोक्यात आणली. वेळीच आग विझवण्यात आल्याने मुख्य बाजारपेठेसह आसपासच्या दुकानांना आगीची झळ बसण्याचा धोका टळला.
या बचावकार्यात खेड नगरपरिषदेचे फायरमन श्याम देवळेकर, फायरमन दीपक देवळेकर, वाहनचालक गजानन जाधव आणि सहायक फायरमन सुरज शिगवण यांनी सहभाग घेतला. स्थानिक तरुण आणि युवा सैनिकांनीही आग विझवण्याच्या कामात अग्निशमन दलाला सहकार्य केले.
घटनेची माहिती मिळाल्यानंतर खेडचे नगराध्यक्ष, नगरसेवक आणि स्थानिक नागरिक घटनास्थळी दाखल झाले होते. सुदैवाने या दुर्घटनेत कोणतीही जीवितहानी झाल्याचे वृत्त नाही. मात्र, दर्शनी भागातील भाजीपाला जळाल्याने नुकसान झाले आहे.
दरम्यान, आगीचे नेमके कारण आणि झालेल्या आर्थिक नुकसानीचा तपशील तपासानंतर स्पष्ट होणार आहे. विद्युत जोडणी आणि मोबाईल चार्जरच्या ठिकाणी शॉर्टसर्किट झाल्याचा प्राथमिक अंदाज असला, तरी आगीचे अधिकृत कारण अद्याप स्पष्ट झालेले नाही.
मध्यरात्रीच्या वेळी घडलेल्या या घटनेत अग्निशमन दलाने वेळीच धाव घेतल्याने संभाव्य मोठे नुकसान टळले.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
