रत्नागिरी एमआयडीसी परिसरातील एका धान्याच्या गोदामात गाडी खाली करण्याचे काम सुरू असताना अचानक चक्कर येऊन पडलेल्या ४३ वर्षीय हमालाचा दुर्दैवी मृत्यू झाला. प्रकाश लक्ष्मण पाटील (वय ४३, मूळ रा. हत्तरगी, हुक्केरी, जि. बेळगाव, कर्नाटक; सध्या रा. एमआयडीसी, रत्नागिरी) असे मृत कामगाराचे नाव आहे. ही घटना १० ऑक्टोबर २०२६ रोजी घडली. या प्रकरणी रत्नागिरी ग्रामीण पोलीस ठाण्यात आकस्मिक मृत्यूची नोंद करण्यात आली आहे.
मिळालेल्या माहितीनुसार, प्रकाश पाटील हे रत्नागिरीतील शारदा रोडलाईन येथे हमालीचे काम करत होते. या ठिकाणी संतोष भागवत शेळके हे कामावर येणाऱ्या हमालांना कामाचे वाटप करतात. नेहमीप्रमाणे १० ऑक्टोबर रोजी सकाळी ७ वाजण्याच्या सुमारास प्रकाश पाटील कामासाठी हजर झाले होते. त्यानंतर त्यांना रत्नागिरी एमआयडीसी परिसरातील धान्याच्या गोदामात आलेल्या गाड्या खाली करण्याच्या कामासाठी पाठवण्यात आले.
दुपारच्या सुमारास गोदामात धान्याची गाडी खाली करण्याचे काम सुरू असताना प्रकाश पाटील यांना अचानक चक्कर आली. त्यामुळे ते खाली बसले. काही वेळानंतर त्यांच्या शरीराची हालचाल होत नसल्याचे सहकाऱ्यांच्या लक्षात आले. या प्रकारामुळे गोदामातील सहकाऱ्यांची धावपळ उडाली.
जिल्हा रुग्णालयात नेले; डॉक्टरांनी मृत घोषित केले
प्रकाश पाटील यांची प्रकृती बिघडल्याचे लक्षात येताच उपस्थित सहकाऱ्यांनी त्यांना तातडीने रत्नागिरी येथील जिल्हा शासकीय रुग्णालयात दाखल केले. मात्र, रुग्णालयातील वैद्यकीय अधिकाऱ्यांनी तपासणी केल्यानंतर दुपारी ३ वाजून ४३ मिनिटांनी त्यांना मृत घोषित केले.
या घटनेची माहिती संतोष भागवत शेळके यांनी पोलिसांना दिली. त्यानुसार रत्नागिरी ग्रामीण पोलिसांनी भारतीय नागरिक सुरक्षा संहिता (बीएनएसएस) कलम १९४ अन्वये आकस्मिक मृत्यू क्रमांक ९४/२०२६ अशी नोंद केली आहे.
कामावर असताना अचानक प्रकृती बिघडल्याने एका हमालाचा मृत्यू झाल्याच्या या घटनेमुळे परिसरात हळहळ व्यक्त होत आहे. प्रकाश पाटील यांच्या मृत्यूचे नेमके कारण स्पष्ट झाले आहे की नाही, याबाबत अधिकृत माहिती उपलब्ध नसून, या प्रकरणाचा पुढील तपास रत्नागिरी ग्रामीण पोलीस करत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
