चिपळूण शहराला वारंवार भेडसावणाऱ्या पूरसमस्येच्या पार्श्वभूमीवर वाशिष्ठी खाडीतील गाळ उपशाचा प्रश्न पुन्हा ऐरणीवर आला आहे. या प्रश्नावर तोडगा काढण्यासाठी आमदार शेखर निकम यांनी बंदरे व मत्स्यव्यवसाय मंत्री नितेश राणे यांच्याकडे केलेल्या मागणीची दखल घेण्यात आली असून, येत्या २२ ऑक्टोबर रोजी मुंबईत उच्चस्तरीय बैठक आयोजित करण्यात आली आहे. त्यामुळे वाशिष्ठी खाडीतील गाळ उपशाच्या कामाला गती मिळणार का, याकडे चिपळूणकरांचे लक्ष लागले आहे.
गोवळकोटपुढील गाळ उपशाचा प्रश्न प्रलंबित
२०२१ मध्ये चिपळूणमध्ये आलेल्या महापुरानंतर वाशिष्ठी नदीतील गाळ काढण्याच्या कामाला सुरुवात झाली होती. मात्र, गोवळकोटच्या पुढील नदीपात्राचा काही भाग सीआरझेड क्षेत्रात तसेच महाराष्ट्र सागरी मंडळाच्या कार्यक्षेत्रात येत असल्याने या भागातील गाळ उपशाचे काम रखडल्याचे सांगण्यात येत आहे.
नदीपात्रातील गाळामुळे पाण्याच्या प्रवाहावर परिणाम होत असल्याने पूरस्थितीचा धोका कमी करण्यासाठी गाळ उपशाची मागणी सातत्याने केली जात आहे. या कामातील प्रशासकीय आणि तांत्रिक अडथळे दूर करून गाळ काढण्याचा मार्ग मोकळा करावा, अशी मागणी आमदार शेखर निकम यांनी केली आहे.
२२ ऑक्टोबरला मुंबईत उच्चस्तरीय बैठक
या प्रश्नावर चर्चा करण्यासाठी २२ ऑक्टोबर रोजी दुपारी १ वाजता मुंबईतील मंत्रिमंडळाच्या दालन क्रमांक २ मध्ये बैठक होणार आहे. या बैठकीला संबंधित विभागांचे वरिष्ठ अधिकारी, रत्नागिरीचे जिल्हाधिकारी आणि आमदार शेखर निकम उपस्थित राहणार आहेत.
बैठकीत वाशिष्ठी खाडीतील गाळ उपशासंदर्भातील प्रलंबित प्रश्न, प्रशासकीय अडचणी आणि पुढील कार्यवाही यावर चर्चा होण्याची अपेक्षा आहे.
पूरमुक्त चिपळूणसाठी निर्णयाकडे लक्ष
चिपळूण शहरातील पूरस्थितीचा प्रश्न हा नागरिकांच्या सुरक्षिततेशी, व्यापारी वर्गाच्या व्यवसायाशी आणि स्थानिक जनजीवनाशी संबंधित आहे. त्यामुळे वाशिष्ठी नदी व खाडीतील गाळ उपशाबाबत ठोस निर्णय होणे महत्त्वाचे मानले जात आहे.
२२ ऑक्टोबरच्या बैठकीत संबंधित विभागांमध्ये समन्वय साधून प्रलंबित अडथळ्यांवर तोडगा निघतो का आणि प्रत्यक्ष गाळ उपशाच्या कामाला परवानगी व गती मिळते का, हे पाहणे महत्त्वाचे ठरणार आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
