चिपळूण तालुक्यातील कळंबस्ते येथे पहाटेच्या सुमारास अंधाराचा फायदा घेत संशयास्पदरीत्या वावरत असलेल्या एका परप्रांतीय मजुराला चिपळूण पोलिसांनी गस्तीदरम्यान ताब्यात घेतले. पोलिसांची चाहूल लागताच त्याने पळून जाण्याचा प्रयत्न केला; मात्र पोलिसांनी पाठलाग करून त्याला पकडले. या प्रकरणी त्याच्याविरुद्ध महाराष्ट्र पोलीस अधिनियमांतर्गत गुन्हा दाखल करण्यात आला आहे.
अर्जुनकुमार बाल्मिकी सहा (वय २७, रा. पंडितपूर, जि. गोपाळगंज, बिहार) असे ताब्यात घेण्यात आलेल्या संशयिताचे नाव आहे.
मिळालेल्या माहितीनुसार, ३ ऑक्टोबर रोजी पहाटेच्या सुमारास चिपळूण पोलीस ठाण्याचे पथक ग्रामीण भागात नियमित गस्त घालत होते. यावेळी पहाटे सुमारे पावणेपाच वाजण्याच्या सुमारास कळंबस्ते येथील मराठी शाळेजवळ पोलिसांना एक तरुण अंधाराचा फायदा घेत संशयास्पदरीत्या उभा असल्याचे दिसून आले.
सदर तरुण पोलिसांपासून आपली ओळख आणि हालचाली लपविण्याचा प्रयत्न करत असल्याचे पोलिसांच्या निदर्शनास आले. पोलिसांची चाहूल लागताच त्याने तेथून पळून जाण्याचा प्रयत्न केला. मात्र, गस्तीवरील पोलिसांनी प्रसंगावधान राखत त्याचा पाठलाग केला आणि त्याला ताब्यात घेतले.
ताब्यात घेतल्यानंतर पोलिसांनी इतक्या पहाटेच्या वेळी अंधारात शाळेजवळ संशयास्पद अवस्थेत का थांबला होता, याबाबत त्याच्याकडे चौकशी केली. मात्र, त्याने समाधानकारक माहिती दिली नसल्याचे पोलिसांनी सांगितले. त्यामुळे त्याच्या हालचालींबाबत पोलिसांचा संशय अधिक बळावला.
दरम्यान, चोरीच्या उद्देशाने तो परिसरात दबा धरून बसला असल्याचा संशय व्यक्त करण्यात आला आहे. या पार्श्वभूमीवर पोलिसांनी त्याच्याविरोधात कायदेशीर कारवाई केली.
याप्रकरणी चिपळूण पोलीस ठाण्याचे पोलीस कॉन्स्टेबल राकेश मनोहर चव्हाण यांनी दिलेल्या फिर्यादीवरून अर्जुनकुमार बाल्मिकी सहा याच्याविरुद्ध महाराष्ट्र पोलीस अधिनियम कलम १२२ (क) अन्वये गुन्हा दाखल करण्यात आला आहे.
या घटनेचा पुढील तपास चिपळूण पोलीस करत असून, संशयिताच्या पूर्वीच्या हालचाली तसेच तो परिसरात नेमका कोणत्या कारणासाठी आला होता, याबाबतही तपास केला जात आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
