बोरिवली (आडीवाडी) : प्रतिनिधी – सागर गोवळे
पहाटेच्या सुमारास बोरिवली-आडीवाडी येथील मुख्य रस्त्यालगत असलेले मोठे झाड अचानक कोसळून वीजवाहिनीवर पडल्याची घटना घडली. झाड वीजतारांवर कोसळल्याने या मार्गावरील वाहतूक ठप्प झाली, तसेच परिसरातील वीजपुरवठाही खंडित झाला. झाड वीजवाहिनीवर अडकल्याने नागरिकांच्या सुरक्षेचा प्रश्न निर्माण झाला होता.
घटनेची माहिती मिळताच कोणत्याही प्रशासकीय यंत्रणेची वाट न पाहता बोरिवली-आडीवाडीतील ग्रामस्थांनी तत्काळ घटनास्थळी धाव घेतली. तरुणांसह ज्येष्ठ नागरिकांनी एकत्र येत कुऱ्हाडी, करवती आणि दोऱ्यांच्या साहाय्याने झाडाच्या फांद्या व खोड हटवण्याचे काम हाती घेतले.
वीजवाहिनीवर झाड पडल्याने धोका लक्षात घेऊन आवश्यक खबरदारी घेत ग्रामस्थांनी मोठ्या फांद्या कापून बाजूला केल्या. त्यानंतर रस्त्यावर पडलेले खोड व फांद्या हटवून मुख्य रस्ता वाहतुकीसाठी मोकळा करण्यात आला. तसेच वीजतारांवरील झाडाचा भार कमी केल्याने महावितरणच्या कर्मचाऱ्यांना वीजपुरवठा सुरळीत करण्यासाठी काम करणे सुलभ झाले.
ग्रामस्थांच्या एकजुटीमुळे अवघ्या काही वेळातच रस्त्यावरील अडथळा दूर करण्यात आला. संकटाच्या प्रसंगी प्रशासनाची वाट न पाहता ग्रामस्थांनी दाखवलेली तत्परता आणि सामाजिक बांधिलकी कौतुकास्पद ठरत आहे.
बोरिवली-आडीवाडी ग्रामस्थांनी दाखवलेल्या या एकजुटीमुळे वाहतूक सुरळीत होण्यास मदत झाली असून, गावकऱ्यांच्या तत्परतेचे परिसरातून कौतुक होत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
