दापोली-खेड-मंडणगड विधानसभा मतदारसंघातील विविध प्रलंबित आणि नागरिकांच्या दैनंदिन जीवनाशी संबंधित प्रश्नांकडे शासन व प्रशासनाचे लक्ष वेधण्यासाठी भारतीय जनता पक्षाच्या दापोली तालुका शाखेने आक्रमक भूमिका घेतली आहे. १५ ऑगस्ट, स्वातंत्र्यदिनापासून दापोली तहसील कार्यालयासमोर आमरण उपोषण करण्याचा इशारा भाजपने दिला आहे. या संदर्भात भाजप तालुकाध्यक्ष जया अजय साळवी यांच्या स्वाक्षरीचे निवेदन जिल्हाधिकाऱ्यांना देण्यात आले आहे.
दापोली भाजप कार्यालयात यासंदर्भात पत्रकार परिषद घेण्यात आली. यावेळी भाजप नेते केदार साठे, माजी आमदार सूर्यकांत दळवी, तालुकाध्यक्ष जया साळवी, दापोली शहराध्यक्ष सचिन होडबे, दापोली ग्रामीण तालुका अध्यक्ष संदीप केळकर आदी पदाधिकारी उपस्थित होते. पत्रकार परिषदेत दापोली तालुक्यातील विविध प्रश्नांवर प्रशासनाने तातडीने कार्यवाही करण्याची मागणी करण्यात आली.
गाडीतळ येथील तालुका स्कूलच्या जागेवर राष्ट्रीय स्मारकाची मागणी
भाजपने मांडलेल्या मागण्यांमध्ये दापोली शहरातील गाडीतळ येथील सध्या बंद असलेल्या तालुका स्कूलच्या जागेवर राष्ट्रीय दर्जाचे स्मारक उभारावे, ही प्रमुख मागणी आहे. या जागेचा योग्य वापर करून दापोलीच्या ऐतिहासिक आणि सामाजिक वारशाला साजेसे स्मारक उभारल्यास त्याचा पर्यटन आणि स्थानिक विकासाला फायदा होऊ शकतो, अशी भूमिका भाजपकडून मांडण्यात आली आहे.
दापोली-खेड, दापोली-मंडणगड रस्त्यांची दुरवस्था
दापोली तालुका हा पर्यटनदृष्ट्या महत्त्वाचा असून ‘मिनी महाबळेश्वर’ म्हणूनही ओळखला जातो. दापोली शहरासह समुद्रकिनारे, पर्यटनस्थळे आणि ग्रामीण भागात वर्षभर मोठ्या संख्येने पर्यटक व नागरिकांची ये-जा सुरू असते.
मात्र, दापोली-खेड आणि दापोली-मंडणगड या प्रमुख मार्गांची दुरवस्था झाल्याने नागरिक आणि वाहनचालकांना मोठ्या अडचणींचा सामना करावा लागत असल्याचा आरोप भाजपने केला आहे. अनेक ठिकाणी मोठमोठे खड्डे पडले असून पावसाळ्यात या खड्ड्यांमध्ये पाणी व चिखल साचत असल्याने वाहतुकीला अडथळे निर्माण होत आहेत.
गणेशोत्सवासाठी मुंबईसह विविध भागांतून मोठ्या संख्येने चाकरमानी कोकणात दाखल होणार आहेत. या पार्श्वभूमीवर गणपती उत्सवापूर्वी दोन्ही रस्त्यांची तातडीने दुरुस्ती करावी, अशी आग्रही मागणी भाजपने केली आहे.
आंबेत पुलाचा प्रश्नही ऐरणीवर
दापोली आणि रायगड जिल्ह्याला जोडणाऱ्या आंबेत पुलाचा प्रश्न देखील भाजपने उपस्थित केला आहे. या पुलामुळे दोन्ही जिल्ह्यांमधील नागरिकांची वाहतूक आणि दळणवळणाची सुविधा सुलभ होते. त्यामुळे पुलासंदर्भातील प्रलंबित प्रश्न तातडीने मार्गी लावण्याची मागणी करण्यात आली आहे.
अग्निशमन वाहनासाठी निधी देण्याची मागणी
दापोली नगरपंचायतीच्या अग्निशमन वाहनासाठी उपलब्ध होणाऱ्या निधीचा प्रश्न देखील निवेदनातून मांडण्यात आला आहे. शहर आणि परिसरात वाढत्या वस्तीच्या पार्श्वभूमीवर आपत्कालीन परिस्थितीत तत्काळ मदत मिळण्यासाठी सक्षम अग्निशमन यंत्रणा आवश्यक आहे. त्यामुळे यासाठी आवश्यक निधी उपलब्ध करून देण्याची मागणी भाजपकडून करण्यात आली आहे.
एमआयडीसी जमीन अधिग्रहणाचा मुद्दा
मंडणगड-शिरगाव एमआयडीसीतील जमीन अधिग्रहण हा देखील महत्त्वाचा प्रश्न असल्याचे भाजपने म्हटले आहे. जमीन अधिग्रहण प्रक्रियेत संबंधित जमीनमालकांना योग्य मोबदला मिळावा, अशी मागणी करण्यात आली आहे. स्थानिकांच्या हिताचा विचार करून प्रशासनाने या विषयावर सकारात्मक निर्णय घ्यावा, अशी भूमिका पदाधिकाऱ्यांनी व्यक्त केली.
चिकन-मटण मार्केट इमारतीचा प्रश्न
दापोली शहरातील नवीन चिकन व मटण मार्केट इमारतीसंदर्भातील प्रलंबित प्रश्न देखील भाजपने उपस्थित केला आहे. शहरातील नागरिकांच्या सुविधा आणि बाजारपेठेचे नियोजन लक्षात घेता या इमारतीचा प्रश्न मार्गी लावण्याची मागणी करण्यात आली आहे.
प्रशासनाला आंदोलनाचा इशारा
दापोली तालुक्यातील हे सर्व प्रश्न अनेक दिवसांपासून प्रलंबित असून नागरिकांना त्याचा त्रास सहन करावा लागत असल्याची भूमिका भाजपने मांडली आहे. प्रशासनाने केवळ आश्वासने न देता प्रत्यक्ष कार्यवाही करावी, अशी मागणी करण्यात आली.
निवेदनातील मागण्यांची तातडीने दखल घेऊन संबंधित प्रश्न मार्गी न लावल्यास १५ ऑगस्टपासून दापोली तहसील कार्यालयासमोर आमरण उपोषण सुरू करण्यात येईल, असा स्पष्ट इशारा भाजप तालुका शाखेने दिला आहे.
स्वातंत्र्यदिनापासून सुरू होणाऱ्या या आंदोलनामुळे दापोली तालुक्यातील रस्ते, पायाभूत सुविधा, पर्यटन आणि नागरिकांच्या मूलभूत प्रश्नांवर प्रशासनाची भूमिका काय राहणार, याकडे आता लक्ष लागले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
