रायगड जिल्ह्यातील श्रीवर्धन येथे अमली पदार्थांविरोधातील मोठ्या कारवाईत पोलिसांनी तब्बल ३४ लाख ९८ हजार रुपये किमतीचा ६.९९६ किलो चरस जप्त करत ६३ वर्षीय तस्कराला अटक केली आहे. या कारवाईमुळे परिसरात कार्यरत असलेल्या अमली पदार्थ तस्करांना मोठा धक्का बसला आहे.
श्रीवर्धन तालुक्यात बॉक्साईट वाहतूक करणारे काही चालक चरस व गांजाच्या नशेत वाहने चालवत असल्याने अपघातांचे प्रमाण वाढत असल्याची माहिती पोलिसांना मिळाली होती. त्यानंतर पोलिसांनी विशेष मोहीम हाती घेतली.
१८ जुलै २०२६ रोजी गुप्त बातमीदाराकडून मिळालेल्या माहितीनुसार, सादिक इब्राहीम शेखदरे (वय ६३, रा. शेखाडी) हा चरस विक्रीसाठी येणार असल्याची माहिती मिळाली. पोलीस निरीक्षक सुरेंद्र गरड यांच्या मार्गदर्शनाखाली पथकाने शेखाडीजवळील कोंडीवली स्मशानभूमी परिसरात सापळा रचला.
यावेळी MH-06-CD-6700 क्रमांकाच्या दुचाकीवरून आलेल्या सादिक शेखदरे याला ताब्यात घेऊन झडती घेतली असता, दुचाकीच्या डिकीमध्ये २ किलो १४६ ग्रॅम चरस आढळून आला. या चरसाची किंमत १० लाख ७३ हजार रुपये असल्याचे पोलिसांनी सांगितले.
त्यानंतर पोलीस कोठडीत झालेल्या चौकशीत आरोपीने शेखाडी येथील एका बंद फायबर बोटीत आणखी चरस लपवून ठेवल्याची कबुली दिली. पोलिसांनी तेथे छापा टाकून ४ किलो ८५० ग्रॅम चरस जप्त केला. या साठ्याची किंमत २४ लाख २५ हजार रुपये आहे.
या कारवाईत एकूण ६.९९६ किलो चरस (किंमत ₹३४.९८ लाख), एक मोटरसायकल आणि एक मोबाईल फोन असा सुमारे ३५ लाखांहून अधिक किमतीचा मुद्देमाल जप्त करण्यात आला आहे.
या प्रकरणी आरोपीविरुद्ध एनडीपीएस (NDPS) कायद्यान्वये गुन्हा दाखल करण्यात आला असून न्यायालयाने त्याला २२ जुलै २०२६ पर्यंत पोलीस कोठडी सुनावली आहे. या गुन्ह्याचा पुढील तपास पोलीस उपनिरीक्षक प्रदीप राठोड करत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
