रत्नागिरी जिल्ह्यातील दापोली तालुक्यातील वळणे एमआयडीसी परिसरात सात वर्षीय चिमुरडीवर कथित लैंगिक अत्याचार झाल्याची धक्कादायक घटना समोर आली आहे. या प्रकरणी दापोली पोलीस ठाण्यात भारतीय न्याय संहिता (बीएनएस) २०२३ आणि बालकांचे लैंगिक अत्याचारापासून संरक्षण (पोक्सो) कायद्यानुसार गंभीर कलमांखाली गुन्हा दाखल करण्यात आला असून, पोलीस या प्रकरणाचा सखोल तपास करीत आहेत.
पोलीसांनी दिलेल्या माहितीनुसार, ७ जुलै २०२६ रोजी सायंकाळी सुमारे ६ वाजण्याच्या सुमारास पीडित अल्पवयीन मुलगी तिच्या भावासोबत वळणे एमआयडीसी परिसरातील ‘भोलेनाथचा आधार’ हॉटेलमध्ये वडापाव घेण्यासाठी गेली होती. त्यावेळी हॉटेलमध्ये काम करणाऱ्या आरोपीने मुलीच्या भावाला पाणी आणण्याच्या कारणाने बाहेर पाठवलं. त्यानंतर अल्पवयीन मुलीला हॉटेलच्या स्वयंपाकघरात नेऊन दरवाजा बंद करून तिच्यावर लैंगिक अत्याचार केला.
घरी परतल्यानंतर मुलीने घडलेला प्रकार कुटुंबीयांना सांगितल्यानंतर त्यांनी तातडीने दापोली पोलीस ठाण्यात धाव घेत तक्रार दाखल केली. तक्रारीची दखल घेत दापोली पोलीसांनी गुन्हा रजिस्टर क्रमांक १३५/२०२६ अन्वये भारतीय न्याय संहिता कलम ६४(१), ६४(२)(i), ६५(२) तसेच पोक्सो कायद्याच्या कलम ४(२), ८ आणि १० अंतर्गत गुन्हा नोंदविला.
या प्रकरणातील आरोपी किशोर भगवानजी पटेल (वय ५०) हा मूळचा देवपर, तालुका नखतराणा, जिल्हा भुज (गुजरात) येथील असून, सध्या वळणे एमआयडीसी, ता. दापोली, जि. रत्नागिरी येथे वास्तव्यास असल्याची माहिती पोलीसांनी दिली आहे.
या गुन्ह्याची नोंद पोलीस हवालदार जाधव यांनी केली असून, तपास सहाय्यक पोलीस उपनिरीक्षक हिरेमठ यांच्याकडे सोपविण्यात आला आहे. दापोली पोलीस ठाण्याचे पोलीस निरीक्षक महेश तोरसकर यांनीही प्रकरणाची गंभीर दखल घेतली आहे. घटनास्थळावरील पुरावे, साक्षीदारांचे जबाब आणि इतर तांत्रिक बाबींची पडताळणी करण्यात येत असून, तपास वेगाने सुरू आहे.
पोलीसांनी दाखल केलेल्या गुन्ह्यातील कलमांनुसार हा अत्यंत गंभीर स्वरूपाचा गुन्हा मानला जातो. भारतीय न्याय संहितेच्या कलम ६४(१) आणि ६४(२)(i) अंतर्गत किमान दहा वर्षांपासून आजीवन सश्रम कारावासाची तरतूद आहे. तर कलम ६५(२) अंतर्गत किमान वीस वर्षांचा कारावास किंवा आजीवन कारावासाची तरतूद आहे. याशिवाय पोक्सो कायद्यातील कलम ४(२), ८ आणि १० अंतर्गतही कठोर शिक्षेची तरतूद करण्यात आली आहे.
या घटनेमुळे दापोली तालुक्यात संताप व्यक्त होत असून, अल्पवयीन मुलांच्या सुरक्षिततेचा प्रश्न पुन्हा एकदा ऐरणीवर आला आहे. दोषींवर कठोर कारवाई व्हावी, अशी मागणी नागरिकांकडून होत आहे. दरम्यान, या प्रकरणाचा अधिक तपास दापोली पोलीस करत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
