चिपळूण : मुंबई-गोवा महामार्गावर कापसाळ येथील यामाहा शोरूमसमोर शनिवारी रात्री झालेल्या भीषण अपघातात ५० वर्षीय दुचाकी चालकाचा दुर्दैवी मृत्यू झाला. भरधाव वेगातील दुचाकीवरील नियंत्रण सुटल्याने वाहन थेट महामार्गावरील सिमेंटच्या दुभाजकावर आदळल्याने हा अपघात घडला.
महेश अरुण गुडेकर (वय ५०, रा. श्री समर्थनगर, सी-विंग, कापसाळ, डिगेवाडी, ता. चिपळूण) असे मृत दुचाकी चालकाचे नाव आहे.
मिळालेल्या माहितीनुसार, महेश गुडेकर हे दुचाकीवरून मुंबई-गोवा महामार्गावरून जात असताना वाहनाचा वेग जास्त असल्याने त्यांचे दुचाकीवरील नियंत्रण सुटले. त्यानंतर दुचाकी रस्त्यावरून बराच अंतर घासत गेली आणि महामार्गाच्या डाव्या बाजूला असलेल्या सिमेंटच्या दुभाजकाला जोरदार धडकली.
अपघात इतका भीषण होता की, महेश गुडेकर यांच्या डोक्याला गंभीर दुखापत झाली. मोठ्या प्रमाणात रक्तस्राव झाल्याने त्यांचा जागीच मृत्यू झाला. घटनेनंतर परिसरात काही काळ वाहतुकीची कोंडी निर्माण झाली होती.
या प्रकरणी मृताचे भाऊ तथा रिक्षाचालक राजेंद्र अरुण गुडेकर (वय ५२, रा. काविळतळी, चिपळूण) यांनी चिपळूण पोलीस ठाण्यात फिर्याद दाखल केली आहे. त्यांच्या फिर्यादीवरून पोलिसांनी मृत चालकाविरुद्धच निष्काळजीपणे आणि भरधाव वेगात वाहन चालवून स्वतःच्या मृत्यूस कारणीभूत ठरल्याप्रकरणी भारतीय न्याय संहिता २०२३ अंतर्गत कलम १०६(१), २८१, १२५(अ), १२५(ब) तसेच मोटार वाहन कायदा कलम १८४ अन्वये गुन्हा नोंदवला आहे.
शनिवार, १६ मे रोजी रात्री १२ वाजण्याच्या सुमारास हा गुन्हा दाखल करण्यात आला असून चिपळूण पोलीस पुढील तपास करत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
