दापोली तालुक्यातील निसर्गरम्य आंजर्ले गावचा सुपुत्र निनाद सुभाष जोशी यांची राज्य राखीव पोलीस दल (एसआरपीएफ) मध्ये यशस्वी निवड झाली असून, त्यांच्या या उल्लेखनीय यशामुळे संपूर्ण आंजर्ले गावासह दापोली तालुक्यात आनंद आणि अभिमानाचे वातावरण निर्माण झाले आहे. ग्रामीण भागातून कठोर परिश्रम आणि जिद्दीच्या जोरावर मिळवलेले हे यश अनेक तरुणांसाठी प्रेरणादायी ठरत आहे.
निनाद जोशी यांचा शपथविधी समारंभ आज दौंड येथील नांदविज प्रशिक्षण केंद्रात अत्यंत उत्साहपूर्ण वातावरणात पार पडला. या वेळी प्रशिक्षण केंद्र परिसरात देशसेवेची भावना, शिस्त आणि कर्तव्यनिष्ठेचा उत्साह पाहायला मिळाला. शपथविधीद्वारे निनाद यांनी देशसेवा, कायदा व सुव्यवस्था राखणे आणि नागरिकांच्या सुरक्षेसाठी सदैव तत्पर राहण्याची शपथ घेतली. लहानपणापासूनच शिस्तप्रिय आणि मेहनती स्वभाव असलेल्या निनाद यांनी सातत्यपूर्ण अभ्यास, नियमित शारीरिक सराव आणि प्रबळ इच्छाशक्तीच्या जोरावर हे यश संपादन केले. एसआरपीएफ भरती प्रक्रियेमधील कठीण टप्पे यशस्वीरीत्या पार करत त्यांनी आपल्या कुटुंबाचे तसेच गावाचे नाव अभिमानाने उज्ज्वल केले आहे.
निनाद यांच्या या यशाबद्दल त्यांच्या कुटुंबीयांनी आनंद व्यक्त करताना, “त्याच्या मेहनतीचे आज चीज झाले,” अशा भावना व्यक्त केल्या. मित्रपरिवार, नातेवाईक तसेच आंजर्ले ग्रामस्थांकडून त्यांच्यावर अभिनंदनाचा वर्षाव होत आहे. सोशल मीडियावरूनही अनेकांनी त्यांना शुभेच्छा दिल्या आहेत.
गावातील युवकांनी निनाद यांच्या यशाकडे प्रेरणादायी उदाहरण म्हणून पाहिले असून, ग्रामीण भागातील तरुणांनीही मोठी स्वप्ने पाहून सातत्याने प्रयत्न केल्यास यश नक्की मिळते, हे निनाद यांनी आपल्या कृतीतून दाखवून दिले आहे.भविष्यात निनाद यांनी प्रामाणिकपणे आणि निष्ठेने सेवा बजावत गाव, तालुका आणि जिल्ह्याचे नाव अधिक उज्ज्वल करावे, अशा शुभेच्छा सर्व स्तरांतून व्यक्त करण्यात येत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
