रत्नागिरी शहरातील अमली पदार्थ विक्री करणाऱ्यांविरोधात पोलिसांनी कंबर कसत ‘मिशन फिनिक्स’ अंतर्गत धडक कारवाई सुरू केली आहे. त्याचाच भाग म्हणून रत्नागिरी शहर पोलिसांनी कोकण नगर परिसरात मोठी कारवाई करत ६६ हजार रुपये किमतीच्या ५.५ ग्रॅम ब्राऊन हेरॉईनसह एका तरुणाला अटक केली.
आरमान लियाकत धामस्कर (वय २७, रा. जे.के. फाईल, रत्नागिरी) असे अटक करण्यात आलेल्या संशयिताचे नाव आहे.
रत्नागिरी शहर पोलीस ठाण्याचे पथक हद्दीत नियमित गस्त घालत असताना कोकण नगर येथील साईभूमी नगर अपार्टमेंटच्या मागील बाजूस हा तरुण संशयास्पद हालचाली करताना आढळला. पोलिसांनी त्याला ताब्यात घेऊन चौकशी व झडती घेतली असता, त्याच्याकडे विक्रीच्या उद्देशाने बाळगलेले खाकी रंगाचे ब्राऊन हेरॉईन सापडले.
या कारवाईत पोलिसांनी ६६ हजार रुपये किमतीचा अमली पदार्थ आणि तो ठेवण्यासाठी वापरलेली प्लास्टिक पिशवी असा मुद्देमाल जप्त केला आहे.
ही कारवाई पोलीस अधीक्षक नितीन बगाटे व अपर पोलीस अधीक्षक बी. बी. महामुनी यांच्या मार्गदर्शनाखाली रत्नागिरी शहर पोलीस ठाण्याचे पोलीस निरीक्षक विवेक पाटील व त्यांच्या पथकातील शरद शंकर जाधव तसेच अन्य कर्मचाऱ्यांनी केली.
आरोपीविरोधात अमली पदार्थ विरोधी कायदा (एनडीपीएस) १९८५ अंतर्गत विविध कलमान्वये गुन्हा दाखल करण्यात आला असून पुढील तपास सुरू आहे.
या कारवाईमुळे शहरातील अमली पदार्थ विक्रेत्यांचे धाबे दणाणले असून पोलिसांनी नागरिकांना संशयास्पद हालचाली दिसल्यास तात्काळ माहिती देण्याचे आवाहन केले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
