चिपळूण शहरात भरदिवसा चोरीची एक खळबळजनक घटना समोर आली आहे. एसटी डेपोच्या परिसरात ‘आम्ही पोलीस आहोत’ अशी बतावणी करून दोन अज्ञात भामट्यांनी एका ८० वर्षीय वृद्धाची फसवणूक करत त्यांची सुमारे ९८ हजार रुपये किमतीची सोन्याची चैन लंपास केली. या घटनेमुळे शहरात खळबळ उडाली असून नागरिकांमध्ये भीतीचे वातावरण पसरले आहे.
मिळालेल्या माहितीनुसार, फिर्यादी शांताराम दौलतराव साळवी (वय ८०, रा. गगनगिरी सोसायटी, मार्कंडी, चिपळूण) हे रविवारी, १५ फेब्रुवारी २०२६ रोजी सकाळी ११:३८ वाजण्याच्या सुमारास चिपळूण एसटी डेपोच्या बाजूला असलेल्या स्वागत हॉटेलसमोरील रस्त्यावरून जात होते. यावेळी पाठीमागून मोटारसायकलवरून दोन अज्ञात इसम तिथे आले. या दोन्ही अज्ञात इसमांनी साळवी यांना अडवले आणि आपण पोलीस असल्याची बतावणी केली. “पुढे तपासणी सुरू आहे, तुमचे दागिने काढून रुमालात ठेवा,” असे सांगून त्यांनी साळवी यांना विश्वासात घेतले.
त्यांच्या सांगण्यावरून साळवी यांनी आपल्या गळ्यातील सोन्याची चैन, हातातील घड्याळ आणि घराची चावी काढून स्वतःच्या रुमालात ठेवली.भामट्यांनी तो रुमाल हातात घेतला आणि त्यामध्ये सर्व वस्तू असल्याचे भासवून तो रुमाल पुन्हा साळवी यांच्या हातात दिला. त्यानंतर ते दोघेही तातडीने मोटारसायकलवरून पसार झाले.ते दोघे निघून गेल्यावर साळवी यांनी संशयावरून तातडीने रुमाल उघडून पाहिला. त्यावेळी त्यांना धक्काच बसला.
रुमालात घड्याळ आणि चावी होती, मात्र सुमारे २ तोळे वजनाची ९८,००० रुपये किमतीची सोन्याची चैन गायब होती. आपली फसवणूक झाल्याचे लक्षात येताच त्यांनी तात्काळ पोलीस ठाणे गाठले.या प्रकरणी शांताराम साळवी यांनी दिलेल्या तक्रारीनुसार, चिपळूण पोलीस ठाण्यात अज्ञात दोन इसमांविरुद्ध भारतीय न्यायसंहिता २०२३ चे कलम ३१६(२), ३१८(४) आणि ३(५) अन्वये गुन्हा दाखल करण्यात आला आहे. १५ फेब्रुवारी रोजी दुपारी १५:१३ वाजता या गुन्ह्याची नोंद करण्यात आली असून पोलीस परिसरातील सीसीटीव्ही फुटेजच्या आधारे आरोपींचा शोध घेत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
