दापोली येथे नवीन वर्षाच्या स्वागतासाठी मुंबईहून आलेल्या एका कुटुंबावर हॉटेलच्या रूमचे छत कोसळल्याची धक्कादायक घटना घडली आहे. हॉटेल व्यवस्थापनाच्या हलगर्जीपणामुळे घडलेल्या या घटनेत पती-पत्नी जखमी झाले असून, सुदैवाने मोठी जीवितहानी टळली आहे.
याप्रकरणी हॉटेल ‘चिरा मिडोस’च्या (Hotel Chira Meadows) मालकासह कंत्राटदारावर गुन्हा दाखल करण्यात आला आहे. मुलुंड येथील विकास तिवारी (वय ४८) हे आपल्या पत्नी साधना तिवारी आणि मुलासह सुट्ट्या घालवण्यासाठी दापोलीला आले होते.
त्यांनी दापोली तालुक्यातील जालगाव येथील ‘हॉटेल चिरा मिडोस’ मध्ये रूम नंबर १०६ बुक केली होती. ३० डिसेंबर २०२५ रोजी मध्यरात्री १२.२० (००.२०) वाजण्याच्या सुमारास तिवारी कुटुंब रूममध्ये असताना अचानक छताचा मोठा भाग खाली कोसळला. हे छत थेट विकास तिवारी, त्यांची पत्नी आणि मुलाच्या अंगावर पडले. या घटनेत विकास तिवारी आणि त्यांची पत्नी साधना तिवारी (वय ४५) यांना दुखापत झाली आहे.
पोलिसांनी दिलेल्या माहितीनुसार, हॉटेलचे मालक डॉ. राजेंद्र जगदाळे यांना रूमचे छत मोडकळीस आल्याची आणि ते पडू शकते याची पूर्णपणे जाणीव होती. त्यांनी ही धोकादायक रूम फिर्यादींना भाड्याने दिली. तसेच, हॉटेलच्या बांधकाम कॉन्ट्रॅक्टरने छताचे बांधकाम निकृष्ट दर्जाचे केल्यामुळे हा अपघात घडल्याचे तक्रारीत म्हटले आहे.
फिर्यादी विकास तिवारी यांनी दिलेल्या तक्रारीवरून दापोली पोलिसांनी हॉटेल मालक डॉ. राजेंद्र जगदाळे आणि अज्ञात बांधकाम कॉन्ट्रॅक्टर यांच्या विरोधात भारतीय न्यायसंहिता (BNS) २०२३ चे कलम १२५ (अ) (दुसऱ्याचा जीव किंवा वैयक्तिक सुरक्षितता धोक्यात आणणारे कृत्य) आणि ३(५) (संगनमत) अन्वये गुन्हा दाखल केला आहे (गुन्हा रजिस्टर नंबर २४६/२०२५). पर्यटकांनी गजबजलेल्या दापोलीत हॉटेलमधील अशा बेजबाबदार कारभारामुळे पर्यटकांमध्ये भीतीचे वातावरण पसरले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
