संगमेश्वर : बंद घराचे कुलूप तोडून साडेतीन लाखांची घरफोडी

संगमेश्वर तालुक्यातील कडवई उभीवाडी आणि आकरवाडी येथे अज्ञात चोरट्याने भरदिवसा बंद घराचे कुलूप तोडून मोठी चोरी केल्याची घटना उघडकीस आली आहे. या घरफोडीत चोरट्याने रोख रक्कम, सोन्याचे दागिने आणि घराच्या आवारात उभी केलेली दुचाकी असा एकूण ३ लाख ५५ हजार रुपयांचा मुद्देमाल लंपास केला आहे. या प्रकरणी संगमेश्वर पोलीस ठाण्यात अज्ञात चोरट्याविरोधात गुन्हा दाखल करण्यात आला आहे.

याबाबत पोलिसांकडून मिळालेल्या माहितीनुसार, ही घटना दिनांक २१ नोव्हेंबर २०२५ रोजी दुपारी दीड वाजल्यापासून ते २२ नोव्हेंबर २०२५ रोजी दुपारी १२ वाजेच्या दरम्यान घडली. फिर्यादी रोजिना इरफान जुवळे (वय ४९, रा. कडवई उभीवाडी) या आपल्या घराला कुलूप लावून गेल्या होत्या. या संधीचा फायदा घेत अज्ञात चोरट्याने त्यांच्या घराच्या दरवाजाचा कडीकोंडा कोणत्यातरी हत्याराने तोडून घरात प्रवेश केला. चोरट्याने घरातील कपाटात ठेवलेली ६० हजार रुपयांची रोकड आणि २ लाख ४५ हजार रुपये किमतीचे ३५ ग्रॅम वजनाचे सोन्याचे दागिने चोरून नेले.

तसेच, फिर्यादी यांचे शेजारी राहणारे साक्षीदार मुराद अली काझी यांची होंडा ॲक्टिवा ही दुचाकी फिर्यादी यांच्या घराच्या परिसरात उभी होती. चोरट्याने घरात प्रवेश केल्यानंतर कपाटात असलेली या गाडीची चावी शोधून काढली आणि त्या चावीच्या साहाय्याने घराबाहेर उभी केलेली मुराद अली काझी यांची ५० हजार रुपये किमतीची निळ्या रंगाची होंडा ॲक्टिवा (MH-02-GF-6159) देखील चोरून नेली. अशा प्रकारे रोख रक्कम, सोन्याचे दागिने आणि दुचाकी मिळून एकूण ३ लाख ५५ हजार रुपयांचा ऐवज चोरीला गेला आहे.

ही चोरीची घटना लक्षात आल्यानंतर रोजिना जुवळे यांनी २३ नोव्हेंबर रोजी सायंकाळी संगमेश्वर पोलीस ठाण्यात धाव घेत तक्रार दाखल केली. त्यांच्या फिर्यादीवरून पोलिसांनी अज्ञात आरोपीविरोधात भारतीय न्याय संहिता (बी.एन.एस.) कलम ३०५ (ए), ३३१ (३) आणि ३३१ (४) अन्वये गुन्हा दाखल केला आहे. भरवस्तीत आणि दिवसाढवळ्या घडलेल्या या प्रकारामुळे कडवई परिसरात भीतीचे वातावरण पसरले असून पोलीस अधिक तपास करत आहेत.

प्रतिनिधी

वेगवान बातमी, अचूक आणि थेट भूमिका !

कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म

©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*