दिवाळीच्या शुभप्रसंगी दाभोळ गाव खऱ्या अर्थाने स्वरांच्या झंकाराने उजळून निघाले. सागरपुत्र विद्या विकास संस्था आणि लोकमान्य टिळक स्मारक ट्रस्ट यांच्या संयुक्त विद्यमाने दाभोळ येथे नुकतीच ब्रह्मनाद ग्रुप निर्मित ‘गंध स्वरांचा’ संगीत मैफल रंगली. दिवाळीच्या सणाचे औचित्य साधत आयोजित केलेल्या या कार्यक्रमाने दाभोळच्या सांस्कृतिक परंपरेला एक नवे सुरेल पान जोडले.
ब्रह्मनाद ग्रुपचा दाभोळमधील हा पहिलाच प्रयत्न असून, संगीतप्रेमींच्या उत्स्फूर्त उपस्थितीने तो यशस्वी ठरला. संगीतप्रेमी लोकांना एकत्र आणणे, त्यांच्या कलांना व्यासपीठ मिळवून देणे आणि नवोदित कलाकारांना प्रोत्साहन देणे हा या मैफिलीमागचा मूळ हेतू होता. दिवाळीच्या आनंदात संगीताचा सुवास मिसळत गंध स्वरांचा या उपक्रमाने दाभोळच्या सांस्कृतिक परंपरेत एक नवा अध्याय लिहिला. संगीत, कला आणि भावनांचा हा अद्भुत संगम अनुभवताना प्रत्येक श्रोता मंत्रमुग्ध झाला आणि खरोखरच असं वाटलं — “दिवाळी सांजने दाभोळ उजळले!”
कार्यक्रमाची सुरुवात गणेशपूजन आणि दीपप्रज्वलनाने झाली. ज्येष्ठ नागरिक अनंत महाकाळ गुरुजी, किशोर तांबडे, नाना शिगवण आणि किरण फडणीस यांच्या हस्ते दीपप्रज्वलन करून कार्यक्रमाचे शुभारंभ करण्यात आला. त्यानंतर मंचावर सुरेल वातावरणाची निर्मिती झाली. अजित जोशी यांनी सादर केलेल्या “नमन नटवरा विस्मयकारा” या नांदीने मैफिलीची सुरुवात झाली आणि त्यानंतर गीतांचा अविरत प्रवाह सुरू झाला.
एकापेक्षा एक सुंदर गीतांच्या मालिकेने प्रेक्षकांची मने जिंकली — ओंकार स्वरूपा, अबीर गुलाल उधळीत रंग, तुझे नाम आले ओटी, गेला दसरा आली दिवाळी हसू नाचू या हो, सखी मंद झाल्या तारका, या भवनातील तीत , वृंदावनी वेणु वाजे, प्रथम तुझं पाहता, कानडा राजा पंढरीचा, गणपती गणराज, कानडाऊ विठ्ठलू कर्नाटकू, नाम तुझे, संत भार पंढरीत, सुखवी तया, मन माझे भुलले, दत्तनामाचा महिमा, अशा भावस्पर्शी गीतांनी वातावरण भारावून गेले. शेवटी जातो जिथे जिथे मी या भैरवीने मैफिलीची सांगता झाली.
या मोहक संगीत प्रवासात डॉ. आनंद गोंधळेकर, अजित जोशी, डॉ. दिलेश मुरकर, संदेश कुलाबकर, महेश सोमण, मधुकर गुरव आणि कु. श्रावणी गोंधळेकर यांनी आपल्या अप्रतिम गायनाने प्रेक्षकांना मंत्रमुग्ध केले.
संगीताला समर्थ वाद्यसाथ मिळाली — ऑर्गन/संवादिनीवर महेश सोमण आणि नाना कुलाबकर, तबल्यावर साध. मकरंद सोमण, पखवाद साथीसाठी मंदार सोमण आणि संदेश कुलाबकर, तर तालवाद्यसाठी नाना कुलाबकर आणि संदेश कुलाबकर यांनी योगदान दिले. संपूर्ण कार्यक्रमाचे सुरेख सूत्रसंचालन डॉ. आनंद गोंधळेकर यांनी केले.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
