रत्नागिरी शहरातील प्रसिद्ध पर्यटनस्थळ रत्नदुर्ग किल्ल्याजवळील पाणभुयार स्पॉट येथे रविवारी समुद्रात पडलेली एक अज्ञात तरुणी अध्याप बेपत्ता असून, घटनेनंतर 24 तास उलटूनही तिचा ठावठिकाणा लागलेला नाही.
सोमवारी सकाळपासून पुन्हा एकदा पोलिस व आपत्कालीन पथकांनी शोधमोहीम राबवली, मात्र ती सापडली नाही. मात्र नाशिकमधून बेपत्ता झालेली एक तरुणी रविवारी रत्नागिरीत आली होती. तिने रत्नदुर्ग किल्ल्यावरून शहरातील एका अनोळखी व्यक्तीच्या मोबाईल वरून आपल्या मित्राला फोन केला होता. त्यानंतर ती तरुणी गायबच आहे.
त्यामुळे समुद्रात पडलेली तरुणी नाशिकमधील असण्याची शक्यता वाढली आहे.
ही घटना रविवार दि. 29 जून रोजी दुपारी 12.30 वाजण्याच्या सुमारास घडली. प्रत्यक्षदर्शींनी दिलेल्या माहितीनुसार, अंदाजे 23 ते 25 वयोगटातील एक तरुणी पाणभुयार स्पॉटजवळ सेल्फी घेण्यात गुंग होती.
या दरम्यान तिने आपले चप्पल आणि स्कार्फ बाजूला ठेवले आणि रेलिंगच्या पुढे गेली. अचानक तोल जाऊन ती थेट खोल समुद्रात (सुमारे 200 ते 250 फूट) पडली. आजूबाजूच्या पर्यटकांनी आरडाओरड केली, मात्र ती काही क्षणांतच खवळलेल्या समुद्रात गायब झाली.
या घटनेची माहिती मिळताच शहर पोलीस, रत्नदुर्ग माउंटेनियर्स, आणि चिपळूणहून आलेले एनडीआरएफचे पथक तत्काळ घटनास्थळी दाखल झाले. फिशरीज विभागाच्या दोन ड्रोन कॅमेऱ्यांच्या सहाय्याने शोधमोहीम राबवण्यात आली. मात्र, खवळलेला समुद्र आणि जोरदार वाऱ्यामुळे शोधकार्यात अडथळे निर्माण झाले. तरुणीची ओळख अद्याप पटलेली नाही.
शहरातील सर्व शासकीय व खासगी वसतीगृहे, शाळा व महाविद्यालयांत पोलिसांनी तपास केला, मात्र कोणतीही बेपत्ता तरुणी असल्याची नोंद सापडलेली नाही. पोलिसांनी सीसीटीव्ही फुटेज, कॉल डिटेल्स तसेच पर्यटकांकडून वर्णन मिळवण्याचा प्रयत्न केला, तरीही कोणतीही ठोस माहिती हाती लागलेली नाही.
उशिराने मिळालेल्या माहितीनुसार दि. २८ जून रोजी बँकेत काम करणारी एक तरुणी नाशिकमधून बेपत्ता झाली होती. त्याबाबत तिच्या नातेवाईकांनी नाशिकमधील पोलीस स्थानकात ती बेपत्ता झाल्याची तक्रार दाखल केली आहे. तर त्याच तरुणीने रविवारी १०. ३० वाजता रत्नदुर्ग किल्ल्यावरून तिथे फिरायला गेलेल्या अनोळखी व्यक्तीच्या मोबाईलवरून आपल्या रत्नागिरीतील मित्राला फोन केला होता. नंतर ती बेपत्ता झाली आहे. याच दरम्यान एक तरुणी समुद्रात पडल्यामुळे हि तरुणी नाशिकची असल्याची शक्यता वाढली आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
