रत्नागिरी तालुक्यातील मावळंगे येथील गावडेआंबे खाडीमध्ये खेकडे पकडण्यासाठी गेलेल्या एका प्रौढाचा पाण्यात बुडून दुर्दैवी मृत्यू झाल्याची घटना समोर आली आहे. संदीप प्रभाकर गुरव (वय ४६, रा. मावळंगे गुरववाडी) असे मृत व्यक्तीचे नाव असून, या घटनेमुळे मावळंगे परिसरात हळहळ व्यक्त होत आहे.
मिळालेल्या माहितीनुसार, संदीप गुरव हे मंगळवारी, १४ जुलै रोजी सकाळी सुमारे ९ वाजण्याच्या सुमारास गावडेआंबे खाडी परिसरात खेकडे पकडण्यासाठी गेले होते. खाडीतील खेकडे पकडणे हा त्यांचा नेहमीचा व्यवसायाचा भाग असल्याने कुटुंबीयांना सुरुवातीला विशेष संशय आला नाही. मात्र, दिवसभर उलटूनही ते घरी परतले नाहीत. त्यामुळे कुटुंबीयांनी आणि ग्रामस्थांनी परिसरात शोधाशोध सुरू केली. शोध घेऊनही त्यांचा कोणताही मागमूस न लागल्याने चिंतेचे वातावरण निर्माण झाले.
यानंतर संदीप गुरव यांचे नातेवाईक स्वप्निल प्रभाकर गुरव यांनी पूर्णगड सागरी पोलीस स्थानकात याबाबत माहिती दिली. माहिती मिळताच पोलिसांनी तातडीने शोधमोहीम सुरू करण्याचा निर्णय घेतला.
बुधवारी, १५ जुलै रोजी सकाळी पूर्णगड सागरी पोलीस पथकाने बोटीच्या सहाय्याने गावडेआंबे खाडी परिसरात शोधमोहीम राबवली. सुमारे सकाळी १० वाजण्याच्या दरम्यान संदीप गुरव यांचा मृतदेह खाडीच्या पाण्यावर तरंगताना आढळून आला. त्यानंतर ग्रामस्थांच्या मदतीने मृतदेह बाहेर काढण्यात आला. आवश्यक पंचनामा करून मृतदेह शवविच्छेदनासाठी शासकीय रुग्णालयात पाठविण्यात आला.
संदीप गुरव हे शेती आणि मासेमारी व्यवसाय करून आपल्या कुटुंबाचा उदरनिर्वाह करत होते. त्यांच्या अकाली निधनामुळे गुरव कुटुंबावर मोठे दुःख कोसळले असून, मावळंगे गावात शोककळा पसरली आहे. मेहनती आणि मनमिळावू स्वभावामुळे त्यांची परिसरात ओळख होती. त्यांच्या निधनाची वार्ता समजताच नातेवाईक, मित्रपरिवार आणि ग्रामस्थांनी हळहळ व्यक्त केली.
या घटनेची नोंद पूर्णगड सागरी पोलीस स्थानकात करण्यात आली असून, मृत्यूचे नेमके कारण शवविच्छेदन अहवालानंतर स्पष्ट होणार आहे. पुढील तपास पूर्णगड सागरी पोलीस करत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
