रत्नागिरी-कोल्हापूर महामार्गावरील आंबा घाटात शनिवारी सकाळी मोठी दुर्घटना थोडक्यात टळली. घाटातील गणेश मंदिर परिसरात डोंगरावरून अचानक दगड कोसळून एक प्रचंड दगड रस्त्याच्या मध्यभागी येऊन पडल्याने दोन्ही बाजूंची वाहतूक पूर्णपणे ठप्प झाली होती. सुदैवाने दगड कोसळला त्यावेळी कोणतेही वाहन त्या ठिकाणाहून जात नसल्याने जीवितहानी टळली. मात्र काही क्षणांचा उशीर झाला असता तर गंभीर अपघात घडण्याची शक्यता होती.
आंबा घाट हा रत्नागिरी आणि कोल्हापूर जिल्ह्यांना जोडणारा अत्यंत महत्त्वाचा आणि वर्दळीचा मार्ग आहे. विशेषतः पावसाळ्यात या घाटात दरड कोसळण्याच्या घटना घडत असल्याने वाहनचालकांना नेहमीच सावधगिरी बाळगावी लागते. शनिवारी सकाळी गणेश मंदिराजवळील तीव्र वळणावर अचानक मोठा दगड रस्त्यावर कोसळल्याने वाहनांच्या लांबच लांब रांगा लागल्या. रस्त्याच्या दोन्ही बाजूंना वाहतूक थांबल्याने अनेक प्रवासी अडकून पडले.
घटनेची माहिती मिळताच आंबा घाट पोलीस पथकातील प्रताप वाकरे, भीम कोळी, रोहित मांगले आणि चालक रिलेश कांबळे यांनी तातडीने घटनास्थळी धाव घेतली. त्यांनी सर्वप्रथम दोन्ही बाजूंची वाहतूक थांबवून परिसर सुरक्षित केला. त्यानंतर रस्त्यावर पडलेला प्रचंड दगड हटविण्याचा प्रयत्न सुरू केला. मात्र दगडाचा आकार मोठा असल्याने तो हलविणे अत्यंत कठीण जात होते.
याचवेळी सांगली जिल्ह्यातील तासगाव येथील काही तरुण पर्यटनासाठी आंबा घाटातून प्रवास करत होते. रस्त्यावर निर्माण झालेली अडचण आणि पोलिसांची धडपड पाहून त्यांनी कोणतीही सूचना किंवा विनंती न करता स्वतःहून मदतीचा हात पुढे केला. पोलिसांसह सर्वांनी एकत्रितपणे प्रयत्न करत रस्त्यातील दगड बाजूला करण्यासाठी शर्थीचे प्रयत्न केले. अखेर सामूहिक प्रयत्नांना यश आले आणि काही वेळातच रस्ता वाहतुकीसाठी खुला करण्यात आला.
वाहतूक सुरळीत झाल्यानंतर वाहनचालकांनी आणि प्रवाशांनी सुटकेचा निश्वास सोडला. पोलिसांनीही वाहनचालकांना घाटातून जाताना सावधगिरी बाळगण्याचे आवाहन केले. पावसाळ्याच्या पार्श्वभूमीवर घाट परिसरात दरड कोसळण्याचा धोका कायम असल्याने आवश्यक असल्यासच प्रवास करावा, तसेच वेगावर नियंत्रण ठेवून सुरक्षित अंतर राखावे, असे आवाहन करण्यात आले आहे.
या संपूर्ण घटनेत आंबा घाट पोलिसांची तत्परता आणि तासगावच्या तरुणांनी दाखविलेली सामाजिक जबाबदारी यामुळे संभाव्य मोठी दुर्घटना टळली. संकटसमयी प्रशासन आणि नागरिकांनी एकत्र येत केलेल्या कार्याचे वाहनचालक आणि स्थानिक नागरिकांकडून कौतुक करण्यात येत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
