आंबा घाटातील दख्खन परिसरात घडलेल्या थरारक दरोड्याच्या घटनेने संपूर्ण जिल्ह्यात खळबळ उडाली आहे. म्हैस घेऊन कोल्हापूरकडे निघालेल्या एका व्यापाऱ्याला अडवून त्याचे अपहरण, मारहाण आणि लूटमार करणाऱ्या टोळीचा देवरुख पोलिसांनी अवघ्या काही तासांत पर्दाफाश केला असून पाच आरोपींना अटक करण्यात आली आहे. उर्वरित फरार आरोपींचा शोध सुरू आहे.
कोल्हापूर जिल्ह्यातील शाहूवाडी येथील प्रथमेश तानाजी दळवी हे ८ एप्रिल रोजी सायंकाळी रत्नागिरी जिल्ह्यातील वेतोशी येथून बोलेरो गाडीत म्हैस घेऊन कोल्हापूरच्या दिशेने निघाले होते. सायंकाळी साडेसहा वाजण्याच्या सुमारास आंबा घाटातील दख्खन येथे अचानक दोन संशयास्पद गाड्यांनी त्यांचा मार्ग अडवला.
‘पांडुरंग’ असे लिहिलेली थार आणि ‘भारत सरकार’चा स्टिकर लावलेली इनोव्हा या दोन गाड्यांमधून सुमारे आठ जण बाहेर आले. कोणतीही चौकशी न करता त्यांनी दळवी यांना जबरदस्तीने गाडीतून खाली ओढले आणि बेदम मारहाण सुरू केली.
आरोपींनी दळवी यांच्या अंगावर चाकू ठेवत त्यांना धमकावले आणि जबरदस्तीने इनोव्हा गाडीत बसवले. त्यानंतर त्यांना साखरपा येथील गंद्रे पेट्रोल पंपावर नेण्यात आले. संपूर्ण प्रकार अत्यंत नियोजनपूर्वक आणि संघटित पद्धतीने केल्याचे प्राथमिक तपासात स्पष्ट झाले आहे.
पेट्रोल पंपावर आरोपींनी दळवी यांच्याकडे ५० हजार रुपयांची मागणी केली. त्यांच्याकडे तत्काळ एवढी रक्कम नसल्याचे सांगितल्यावर आरोपींनी गाडीची झडती घेतली आणि केबिनमध्ये ठेवलेले २५ हजार रुपये जबरदस्तीने हिसकावून घेतले.
यावेळी “जर पोलिसांत तक्रार केली तर परिणाम भोगावे लागतील,” अशी धमकी देत आरोपींनी त्यांना सोडून दिले आणि घटनास्थळावरून फरार झाले.
पोलिसांची तात्काळ कारवाई
या घटनेनंतर घाबरलेल्या अवस्थेत दळवी यांनी देवरुख पोलीस ठाण्यात धाव घेत तक्रार नोंदवली. घटनेचे गांभीर्य लक्षात घेऊन रत्नागिरीचे पोलीस अधीक्षक नितीन बगाटे, अपर पोलीस अधीक्षक बी.बी. महामुनी आणि लांजा उपविभागीय पोलीस अधिकारी सुरेश कदम यांच्या मार्गदर्शनाखाली पोलीस निरीक्षक उदय झावरे यांनी तात्काळ तपासाची सूत्रे हाती घेतली.
घटनेच्या ठिकाणचे सीसीटीव्ही फुटेज, मोबाईल लोकेशन आणि इतर तांत्रिक पुराव्यांच्या आधारे पोलिसांनी संशयितांचा माग काढला. अल्पावधीतच रत्नागिरी परिसरातून पाच आरोपींना ताब्यात घेण्यात आले.
अटक करण्यात आलेल्या आरोपींमध्ये
• फरहान रशिद मुल्ला (वय ४२, कोकण नगर)
• प्रथमेश सचिन भाटकर (२४, गोळप)
• सर्वेश सुभाष किर (२२, सोमेश्वर)
• धर्मलिंगम विजयकुमार नाडर (२६, कुवारबांव)
• भूषण बिपेंद्र सावंत (२६, मिऱ्या)
यांचा समावेश आहे.
या सर्व आरोपींविरुद्ध भारतीय न्याय संहिता २०२३ अंतर्गत अपहरण, दरोडा, मारहाण आणि धमकी देण्याचे गंभीर गुन्हे दाखल करण्यात आले आहेत.
या कारवाईत पोलीस उपनिरीक्षक प्रमोद वाघाटे, शांताराम पंदेरे, प्रशांत मसुरकर, सचिन कामेरकर, नितीन जाधव, प्रशांत साळुंखे, अमर सुतार आणि रेश्मा चव्हाण यांनी महत्त्वाची भूमिका बजावली.
या गुन्ह्यातील उर्वरित आरोपी अद्याप फरार असून त्यांचा शोध घेण्यासाठी पोलिसांनी विशेष पथके तयार केली आहेत. लवकरच संपूर्ण टोळीला अटक करण्यात येईल, असा विश्वास पोलिसांनी व्यक्त केला आहे.
या धाडसी आणि जलद कारवाईमुळे रत्नागिरी पोलीस दलाचे सर्वत्र कौतुक होत असून, आंबा घाट परिसरातील नागरिकांमध्ये दिलासा निर्माण झाला आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
