चिपळूण तालुक्यातील रामपूर बौद्धवाडी येथील जिल्हा परिषद शाळा क्रमांक ५ मध्ये घडलेल्या एका गंभीर प्रकारामुळे खळबळ उडाली आहे. सदर शाळेत कार्यरत असलेल्या एका शिक्षकावर चौथीतील अल्पवयीन विद्यार्थिनींचा विनयभंग केल्याचा आरोप करण्यात आला असून या प्रकरणी पोलिसांनी संबंधित शिक्षकाला अटक केली आहे.
पोलिसांनी दिलेल्या माहितीनुसार, रामपूर बौद्धवाडी येथील जिल्हा परिषद शाळा क्रमांक ५ मध्ये कार्यरत असलेला शिक्षक पांडुरंग डाकरे याने चौथीतील विद्यार्थिनींना जवळ बोलावून त्यांच्याशी अश्लील वर्तन केल्याचा आरोप तक्रारीत करण्यात आला आहे.
तसेच गावातील २० ते २३ वयोगटातील चार तरुणींचे फोटो विकृत स्वरूपात वापरल्याचाही प्रकार उघडकीस आला आहे. याशिवाय संबंधित विद्यार्थिनींच्या आईचे फोटोही अश्लील पद्धतीने वापरल्याचा आरोप तक्रारीत नमूद आहे.
या प्रकरणी तक्रार दाखल होताच पोलिसांनी तात्काळ कारवाई करत आरोपी शिक्षक पांडुरंग डाकरे याला अटक केली. आरोपीविरोधात भारतीय न्याय संहिता २०२३ अंतर्गत कलम ७५ व १९, बालकांचे लैंगिक अपराधातून संरक्षण अधिनियम (POCSO) २०१२ अंतर्गत कलम ८ व १२, माहिती तंत्रज्ञान अधिनियमातील कलम ६६ तसेच अनुसूचित जाती व अनुसूचित जमाती अत्याचार प्रतिबंधक अधिनियम १९८९ अंतर्गत कलम ३(१)(w) नुसार गुन्हा दाखल करण्यात आला आहे.
या घटनेनंतर परिसरात तीव्र संताप व्यक्त केला जात असून पालकांमध्ये भीतीचे वातावरण पसरले आहे. विद्यार्थ्यांच्या सुरक्षिततेबाबत पुन्हा एकदा प्रश्नचिन्ह उपस्थित झाले असून शाळांमधील सुरक्षाव्यवस्था अधिक कडक करण्याची मागणी पालक व नागरिकांकडून केली जात आहे. या प्रकरणाचा पुढील तपास पोलीस करीत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
